Tinan Ida Resin Komunidade Taibessi Sosa Bee Moos

Fahe Tutan

Naunil Media (Díli), Komunidade iha área Taibessi, Suku Kulu-Hun, Postu Administrativu Kristu Rei, Munisípiu Díli, infrenta problema bee moos tanba laiha bee hodi utiliza ba nesesidade loron-loron.

Ho kondisaun ne’e obriga komunidade loron-loron tenke hola bee moos litru lima ho folin sentavus lima.

Abitante Agustinha Siqueira, hateten kuaze tinan ida resin sira tenke sosa bee moos hodi komsumu ba nesesidade loron-loron nian, tanba ne’e husu ba parte água saneamentu Munisípiu Díli nian fó atensaun.

“Ami emfrenta ba bee moos, kada loron ami tenke sosa bee litru 5 ho folin sentavus lima. Bee moos ne’ebé ami sosa uza ba tein no hariís”, hateten Agustinha ba Naunil Media iha Taibesse, Suku Kulu-Hun, Segunda (24/02/2020).

Hatán ba preokupasaun ne’e, Diretór Jerál Água Saneamentu Gustavo da Cruz, hateten nia fó ona orientasaun ba diretór sira hodi halo intervesaun iha area Taibessi.

“Deskonfia bomba bee nian balun mak avaria. Ha’u mós simu ona keixa husi konsumidór sira, entaun ha’u fó ona orientasaun ba diretór sira. Ohin ekipa ida mak tun ona iha terrenu hodi ba halo indentifikasaun para bele fó solusaun ba problema bee moos”, informa Gustavo.

Diretór jerál ne’e dehan, atu bele rezolve problema bee moos iha kapital Díli parte Água Saneamentu asina ona koperasaun ho kompaña Don Gung husi Correa.

“Iha semana kotuk foin lalais ne’e, ami mós hala’o ona enkontru ida ho parte kompañiaDon Gung nian ekipa sira hodi halo mobilizasaun dezeñu ida ba bee moos nian. Oinsa mak bele rezolve problema bee moos iha kapital Díli, ita tenke iha dezeña no sistema. Tanba sistema bee moos nian ne’ebé agora existe ne’e komplikadu tantu husi portugés nian tempu to’o Timor-Leste ukun rasik an”. Dehan Gustavo. Lop

Leave a Reply

Your email address will not be published.