FEATUREDIkus LiuNewsSeguransa

DJSM Entrega Sidadaun Estranjeiru Nain-13 ba IOM

Fahe Tutan

Naunil Media (Díli), Sesta (24/07) ne’e, Diresaun Jerál Servisu  Migrasaun (DJSM) entrega ona sidadaun estranjeiru nain-13 ba Organização Internacional Migrasoens (IOM-Sigla Ingles) atu haruka sira fila ba nasaun oríjem.

Diretór Imigrasaun Superintendente Asistente Agustinho Gomes, informa sidadaun estrnajeiru sira ne’e tama iha teritoriu nasionál husi loron 12 Juñu tinan 2020, iha Ilha Jaco postu administrativu Tutuala, Munisipiu Lautem.

“PNTL mak lori sira sidadaun (Vietname-Indonézia) mai halo prosesu aprezenta ba prokuradória distrital Baucau, hetan despaixu  mai iha diresaun jerál servisu Migrasaun finaliza prosesu. Bazeia ba kooperasaun husu ajuda ba IOM atu fasilita no lori fila sira ba nasaun oríjem”, Diretór Imigrasaun Superintendente Asistente Agustinho Gomes, ba jornalista sira iha Kuarentena Raikotu, Sesta (24/07).

Diretór Imigrasaun ne’e informa liu-tan, iha tempu badak nian laran sei deporta sidadaun estranjeirus sira ne’e ba sira nian rai ida-idak. 

“Tuir planu loron 5 fulan  Agostu mak sei transporta emigrante sira ne’e ba nasaun oríjem”, informa Superintendente Asistente Agustinho Gomes. 

Nia esplika, bazeia ba rezultadu no informasaun ne’ebé mak Diresaun Jerál Servisu  Migrasaun kolekta, sidadaun hirak ne’e sai vítima ba ema balu ne’ebé mak bosok sira hodi mai tama iha Timor-Leste. 

“Sira nian distinasaun ne’e la’os mai Timor maibé sidadaun hirak ne’e atu ba Australia. Bazeia ba lei imigrasaun númeru 11/2007, imigrasaun iha kompetensia atu haruka sira fila, sidadaun hirak ne’e hamutuk 13 husi Vietname 11 no Indonesia 2,  mane nain 10 no feto nain 3”, esplika diretór ne’e.

Iha fatin hanesan Represzentante IOM iha Timor-Leste, Jacinto Amaral, informa sira halo ona koodenasaun di’ak IOM iha Vietname ho Indonézia atu bele prosesu deportasaun sidadaun sira ne’e.

“Dahuluk ami intervista ho sira, haree ba sira nia kondisaun depois dadaun ne’e  ami koko kordena ho IOM Hanoi, governu Vietname no IOM Indonesia”, tenik reprezentante IOM iha TL. 

Sidadaun estrnajeiru sira ne’e tama iha teritoriu nasionál husi loron 12 Juñu tinan 2020, iha Ilha Jaco postu administrativu Tutuala, Munisipiu Lautem.

Tuir planu loron 5 fulan  Agostu tinan ne’e sei transporta emigrante sira ne’e ba nasaun oríjem. Flo/Fet

Leave a Reply

Your email address will not be published. Required fields are marked *