Lere Deskorda PSIK Uza Kilat
Naunil Media (Díli), Xefe Estadu Maiór Jenerál FALINTIL-FDTL, Majór Jenerál Lere Anan Timur, deklara la konkorda Polísia Servisu Investigasaun Kriminal (PSIK) mos utiliza kilat, tanba tuir lei responsabilidade ba kilat hotu-hotu mak F-FDTL no PNTL.
“Agora PSIK sira nian ne’e sé mak responsabliza. Tanba ne’e mak ha’u uluk sempre ko’alia, pelumenus Konsellu Seguransa Defeza, ha’u mós menbru seguransa, ha’u lakonkorda tanba Timor idak-idak sosa kilat tuir-nia hakarak”, Jenerál Lere Anan Timur, ba jornalista hafoin sorumutuk ho Prezidente Repúblika (PR), Francisco Guterres ‘Lú Olo’, iha Palasiu Prezidennsial Nicolau Lobato, Bairru Pité, Kuarta (21/10).
Lere husu, Konselu Defeza Seguransa (KDS) tenke sorumutu ho Prezidente Repúblika (PR) mak deside, katak PSIK ne’e iha PNTL nian okos para komanda polísia mak fó kilat ba PSIK.
“Sé PSIK mak sosa kilat, tenki liu husi PNTL mak iha direitu fó kilat ba sira (PSIK). Hanesan mós F-FDTL sosa kilat fó ba nian menbru sira kaer, la’ós kualker ema seluk kaer”, Tenik Lere.
“Ha’u hanoin katak Politíka sira ne’e, dala runa halo sabraut hela tanba ne’e mak ha’u hateten kestaun estabilidade ne’e tanba seguransa nasaun nian ne’e, ita tenke kuidadu estabilidade futuru nian”. Dehan Lere. Pau/Emj9
