PNTL Sei Sobu Kemping iha Tasi Ibun, Superintendente Xefe Polísia Arnaldo : Informasaun Ne’e Laloós

Naunil Media (Díli), Porta Voz PNTL, Superintendente Xefe Polisia Arnaldo de Aroújo, hatete polísia sei halo vizilansia ba aktividade sidadaun (Kamping) iha tasi-ibun, tanba ne’e informasaun ne’ebe espalla iha media, katak PNTL sei sobu Kemping ne’e laloós.   

“Loron haat liu-ba informasaun ne’ebé media fo sai tiha ona iha públiku katak (PNTL) atu sobu kemping sira ne’ebé mak bai-bain joven sira ba halo refressing iha tasi-ibun ne’e laloos, maibé komando polísia nasionál Timor-Leste iha ninia intensaun atu kontrola kemping sira ne’e laos atu sobu”, Porta voz PNTL, Superintendente Xefe Polisia Arnaldo de Araújo, ba jornalista sira iha pres konferensia mak hala’o iha Salaun Enkontru Komando Jeral, Kaikoli, Segunda (26/10).

Porta voz ne’e dehan, dala barak feto ida ho mane rua, dala ruma mos mane ida ho feto rua mak halo kemping iha tasi-ibun, nune’e fó hanoin ba sira atu tau iha konsiensia para labele halo ambiente nasaun nian sai ladi’ak.

“Ema hotu-hotu iha liberdade atu ba kemping iha ne’ebé deit, maibe presija konsiensia moralidade nian ba ita bo’ot sira, para karik ba hala’o aktividade kemping ne’e ho hanoin ne’ebé pozitivu, tamba dala barak akontese ema deskonesidu soe bebe, tara a’an situasaun sira ne’e hotu mai husi aktividade sira hanesan ne’e”, tenik porta voz PNTL ne’e.  

Ikus liu nia husu ba inan-aman sira atu tau matan no kontrola maximu oan sira molok sira hakarak atu sai ba fatin ruma, bele evita tia kedas problema sira ne’ebé sempre mosu iha rai laran, fo ambiental ida ne’ebé ladiak iha nasaun ida ne’e. Nel/Flo