Empreza Pertamina Internasionál Apoiu Atividade Desportu Fitness

Naunil Media (Díli), Empreza Pertamina Internasionál iha Timor-Leste, Beni Harto Wijaya, hateten Empreza Pertamina Internasionál ofisialmente sai patrosinadór atleta JOJO FITNESS no sai ‘Brand Ambassador’ ba atividade desportiva.

Empreza husi nasaun viziñu Indonézia ne’e, aleinde halo negósiu iha Timor-Leste (TL) empreza ne’e mós hakarak hola parte iha atividade sira mak la’o iha area desportu no seluk-tan.

“Ita iha kometimentu buka atu fó apoiu dezenvolve  joven timoroan sira nian vontade” dehan  diretór ezekutivu Pertamina Internasionál  iha Timor-Leste,  Beni Harto Wijaya, ba jornalista  sira, iha Timor Plaza, Pantai Kelapa, Sábadu (25/10).

Harto dehan, apoiu ba JOJO FITNESS nu’udar pasu dahuluk iha desportu nian, Pertamina fó asisténsia finanseira nomós nesesidade ekipa presiza hodi dezenvolve-án.

“Ho parseria ne’ebé ita iha, ita fiar katak JOJO fitness sei dezenvolve an di’ak hodi kompete iha rai laran no mós bele ba kompete iha rai seluk,” nia infora.

Ezekutivu ne’e hatutan,  prezensa Pertamina iha atividade kompetisaun sira iha desportu hodi motiva  joven sira,  kontinua iha vontade no hatudu papél foin-sa’e nian, Tanba joven sira mak  futuru nasaun nian.

Iha fatin hanesan, João Batista Da Conceição Miranda hatutan,  nu’udar atleta Jojo Fitnes apresia ba parseru  ne’ebé hanesan Pertamina Internasionál ne’ebé fó ninia apoiu ba atvidade desportu.

“Ha’u hanesan atleta muda (foin sa’e) ba dahuluk hetan sponsor hosi PERTAMINA internasionál Timor, sente kontente orgullu no agradese ba Pertamina ne’ebé ona apoiu tomak ba ami”. tenik atleta João.

Nia afirma tan, hakarak hatudu  prestasaun, hatudu saida maka  nia iha hodi kompete iha palku desportiva. */Vit