PR Lú Olo Apela Timoroan Hotu Partisipa iha Serimónia 28 Novembru

Naunil Media (Díli), Prezidente Repúblika (PR), Francisco Guterres Lú Olo apela ba Timoroan hotu partisipa iha serimónia Proklamasaun Independénsia ba dala-45.

Naunil Media asesu Liu husi pájina espesiál Presidência da República Democrática de Timor-Leste, 23 Novembru 2020.

Iha audiénsia ho Ministru Administrasaun Estatáll Miguel Pereira Carvalho, Prezidente Repúblika apela ba Timoroan hotu, liuliu ba komunidade sira iha Munisípiu Liquiça atu partisipa ativa iha serimónia 28 novembru.

Tinan ne’e, serimónia içar no areal bandeira sei hala’o iha Kampu Pilila Liquiça. Hafoin audiénsia ho Prezidente Repúblika, Ministru Administrasaun Estatál hateten katak serimónia sira hanesan ne’e sei hametin liután unidade nasionál.

Serimónia içar bandeira sei hala’o iha munisípiu hotu-hotu ho partisipasaun membru VIII Governu Konstitusionál.

“Ema hotu tenke sente pretense ba loron boot ne’e”, Ministru Administrasaun Estatál haktuir Prezidente Repúblika nia apelu.

Prezidente Repúblika sei partisipa diriji serimónia içar bandeira no hato’o diskursu.

Iha loron istóriku ne’e, Prezidente Repúblika sei fó rekoñesimentu Estadu nian ba veteranu luta libertasaun nasionál hamutuk na’in-39.

Ministru Administrasaun Estatal informa katak parte husi komemorasaun Loron Proklamasaun Independénsia realiza atividade desportivas, feira nasionál ne’ebé lansa horseik, misa agradesimentu iha 27 novembru iha igreja Liquiça Vila no konsertu muzikál.

Ba komemorasaun loron Proklamasaun Independénsia, Ministériu Administrasaun Estatal aloka osan ho valór $ 300.000 ba munisípiu 12 no Rejiaun Administrativa Espesiál Oe-cusse-Ambeno (RAEOA). */Pau