IGE,IP Prontu Apoiu Reabilitasaun Estrada Bazeia ba Pedidu Husi Suku Sira
Naunil Media (Díli), Institutu Jestaun Ekipamentu (IGE,IP-Sigla Português), Institutu Públiku ba dadaun ne’e kontinua reabilita Estrada ne’ebé liga suku Muapitine ho suku Fuiluru ho naruk kilómetru 21, iha ne’ebé finaliza ona kilómetru 17 no falta kilómetru 4.
Prezidente IGE,IP, Ermenegilda da Costa Laurentina, hato’o afirmasaun ne’e, Kinta-feira, loron 27 fulan-Novembru tinan 2020, iha Gabinete Prezidente IGE, Kolmera.
Ermenegilda da Costa Laurentina, hateten antes ne’e IGE,IP mós hadia ona estrada ne’ebé liga suku Muapitine ho Lospalos Vila ne’ebé atinji ona porsentu atus ida.
Reabilitasaun estrada ne’e halo hafoin SEKOMS husu apoiu ba IGE,IP bazeia ba pedidu husi autoridade no komunidade suku Muapitine iha diálogu komunitáriu ne’ebé halo ho SEKOMS.
Responsável máxima IGE,IP ne’e reforsa nia parte mós orienta tékniku sira atu foti mós dadus kona-ba reabilitasaun estrada iha suku Lore I no Lore II bazeia ba pedidu husi SEKOMS liuhosi programa Naroman ba Suku.
Prezidente IGE,IP informa katak iha fulan kotuk xefe suku Rotutu, Munisípiu Manufahi mós aprezenta pedidu reabilitasaun estrada ba IGE,IP, maibé ekipa tékniku IGE,IP, sei ba foti uluk dadus, antes halo reabilitasaun.
Ermenegilda da Costa Laurentina hateten IGE prontu atu fó apoiu reabilitasaun estrada iha suku sira seluk iha teritóriu Timor-Leste.
Instituisaun Jestaun Ekipamentu koloka ninia brigada servisu iha munisípiu sanulu-resin-rua inklui RAEOA, iha ne’ebé suku lima to’o hitu iha kada munisípiu maka iha dadus kompletu ne’ebé rekolla husi ekipa tékniku atu hetan apoiu reabilitasaun estrada husi IGE. */Nfm
