Rede Ba Rai Fó Hanoin Governu Respeitu Direitu Povu ba Rai
Naunil Media (Díli), Koordenadór Nasional Rede Ba Rai, Hortencio Pedro Vieira, hateten kuandu atu projetu ruma Governu labele hadau de’it rai ne’ebe povu hela ona, maibe tenki obedese ba prinsípiu Lei espropriasaun.
“Presija asegura prosesu foti rai ne’ebé justu, legal no la fó ameasa ba povu sira nia direitu”, Koordenadór Nasional Rede Ba Rai, Hortencio Pedro Vieira, hateten liu husi nia diskursu iha Salaun FONGTIL Kaikoli, Tersa (1/12).
Tuir koordenadór ne’e, kuandu Governu atu foti rai husi ema individu ka koletivu hodi uza ba interese públiku ruma, presija tetu no análize bazeia ba Lei espropriasaun númeru 8/2017 promulgadu husi Prezidente Repúblika Fracisco Guterres ‘Lú Olo’.
“2017 Prezidente Republika promulga no tama em vigor ona Lei espropriasaun (Lei 8/2017). Lei ne’e atu regula Governu wainhira atu foti ema koletivu ka individual nia rai atu uza ba interese públiku ruma, Governu tenke asegura asistensia legal bá komunidade afetadu”, koordenadór ne’e esplika.
“Ezemplu uma asesivel no aeroporto Nicolau Lobato, ita tenke asegura katak programa hotu planeia iha OJE 2021 inklui orsamentu atu asegura prosesu hirak ne’e”, dehan Nia. Dms
