Oscar Apela Ba Emprezariu Tenke Kumpri Regras Pakote Distribuisaun Sesta Báziku
Naunil Media (Díli), Prezidente Camara Comercio Indústria Timor-Leste (CCI-TL-sigla portugés) Oscar Lima apelu, ba emprezariu tenke kumpri regras pakote distriubisaun programa sesta báziku tanba agora Komisaun Anti Korupsaun (CAC-sigla portugés) akompaña prosesu distribuisaun.
Prezidente Camara Comercio Indústria Timor-Leste (CCI-TL-sigla portugés) Oscar Lima ba jornalista sira iha Centru Convenções Dili, Sesta (4/12).
“Kuandu lori sasán mak la to’o ha’u husu ba emprezariu sira kuidadu. Tanba agora ita iha CAC serteza sei buka tuir ita hotu ne’ebé ha’u hanoin tenke halo detallu, emprezariu sira mós labele nakar, ami mós labele nakar no ami tenke fó kontribuisaun para governu bele hetan resultadu ne’ebé ke di’ak”, dehan Prezidente CCITL Oscar.
Nia dehan, ita hotu-hotu hatene agora iha tempu problema bo’ot ida ne’ebé mosu covid-19 tanba covid-19 governu realiza programa sexta bázika hodi koresponde ka atu fó ajuda ba povu Timor-Leste tomak no sidadaun sira iha direitu atu simu hotu. “Serteza CCI-TL fó apelu ba ha’u-nia emprezariu sira, atu emprezariu fó sira-nia kontribuisaun bo’ot. Emprezario atu halo tuir regras ne’ebé mak iha governu kria.
Antes emprezariu sira atu entrega pakote ida-idak sei lori uluk ba ministériu ne’ebé mak kompetente hodi haree tiha hotu aprova hotu mak halo distribui”. Tenik nia. Vit