Embaixadór Philip Koileta Kankun Kantaderu 30 iha Manufahi
Naunil Media (Manufahi), Kuarta (09/12) ne’e, Embaixadór Nova Zelandia iha Timor-Leste, Philip Hewitt, koileta kankun kantaderu 30 husi Grupu Kreativu Madai, iha Malus-Hun, aldeia Kotalala, suku Letefoho, postu Administrativu Same, Munisípiu Manufahi.
“Ami mai iha ne’e tanba servisu hamotuk ho fundasaun Hader hodi haree liu ba iha atividade ai-han di’ak ba moris di’ak. Alein de ne’e, ami mós suporta komunidade kuda modo bele hadi’ak sira-nia moris iha futuru”, dehan Philip, ba Jornalista sira hafoin koileta kanku, iha Malus-Hun, aldeia Kotalala, suku Letefoho, postu Administrativu Same munisípiu Manufahi.
Diplomata ne’e hateten, direitamente prezensa koileta kankun hanesan simbolikamente husi azuda ne’ebé Nova Zelandia fó atraves Fundasaun Hader.
“Ami mai haree modo ne’ebé komunidade sira kuda moris buras ho di’ak fó vantazen ba komunidade sira no ami mós hakarak dadalia ho komunidade sira”, dehan Philip.
Nia informa, Nova Zelandia apoiu ba Fundasaun Hader nomós suporta komunidade sira, área saúde nian bele fo nutrisaun di’ak. Nune’e mós ekonómia uma laran liu-liu iha tempu COVID-19, tanba komunidade barak mak hetan susar ba seguransa ai-han no ekonómia rai laran.
Iha fatin hanesan responsavel Fundasaun Hader, Manuel Lopes da Cruz, haktuir inísiu hetan apoiu husi Embaixada Nova Zelandia ho materiál hanesan ensada, karaudikur, rega door, mangera, tanki plastik, inklui fini, hanesan kankun, pateka, ai-dila, fore sikoti no brinzela.
“Alein de, ami fahe formasaun teknika ba agrikultór. Embaixada Nova Zelandia apoiu montante $50.000.00, la’ós ba grupu ida maibé ba grupu neén (6) no totál membru 111 iha munisípiu Manufahi”. Tenik Manuel. Nfm
