VIZITA KORTEZIA MAPKOMS BA RÁDIU KOMUNIDADE ILI-WAI MANATUTU
Naunil Media (Manatutu), Ministru ba Asuntus Parlamentares no Komunikasaun Sosiál, S. E. Francisco Martins da Costa Pereira Jerónimo ho ninia komitiva hala’o vizita kortezia ba Rádiu Komunidade Ili-Wai Manatutu Iha tersa-feira, loron 15 fulan-dezembru tinan 2020.
Vizita ne’e ho objetivu atu haree diretamente kondisaun no Atu hatene sira nia problema no mós saida mak sira projeta ba futuru iha rádiu ne’e rasik , nune’e mós mai atu halo komunikasaun ida ne’ebé di’ak ho MAPKOMS ho rádiu komunidade sira hotu liuliu ho rádiu komunidade Ili-Wai Manatutu.
Prezidente Konsellu Rádiu Komunidade Ili-Wai Manatutu, sente kontente ho vizita MAPKOMS nian tanba bele mai haree diretamente kondisaun no situasaun reál rádiu komunidade ne’e.
Prezidente konsellu ne’e afirma Rádiu Komunidade Ili-Wai Manatutu enfrenta problema no difikuldade barak hanesan Transporte ba jornalista sira atu halo kobertura to’o iha area rurais sira. Nune’e mós husu atu fó formasaun ba jornalista sira ho lian portugés, iha rádiu komunidade ne’e.
Iha fatin hanesan, Jestór Rádiu Komunidade Ili-Wai Manatutu hato’o mós preokupasaun sira ne’ebé mak rádiu komunidade ne’e hasoru liuliu kondisaun edifísiu ne’ebé ladún di’ak, problema eletrisidade.
Hatán ba preokupasaun hirak ne’e MAPKOMS nia parte toma nota ba preokupasaun sira ne’e no sei fó solusaun ba problema no difikuldade sira ne’ebé rádiu komunidade ne’e hasoru inklui rekomendasaun ne’ebé sira hato’o liuhosi orsamentu jerál estadu 2021 hodi sustenta funsionamentu serbisu iha estasaun rádiu komunidade ne’e.
Relasiona ho problema infrastrutura, ezekutivu ne’e hateten seidauk bele rezolve iha tinan 2021 maibé nafatin tau iha konsiderasaun. */Tri
