VIZITA KORTEZIA MAPKOMS BA RÁDIU KOMUNIDADE KOLELEMAI SAHE BUCOLI
Naunil Media (Baucau), Ministru ba Asuntus Parlamentares no Komunikasaun Sosiál, S. E. Francisco Martins da Costa Pereira Jerónimo ho ninia komitiva hala’o vizita kortezia ba Rádiu Komunidade Kolelemai Sahe Bucoli Iha tersa-feira, loron 16 fulan-dezembru tinan 2020.
Vizita ne’e ho objetivu atu haree diretamente kondisaun no situasaun reál kona-ba funsionamentu serbisu iha Rádiu Komunidade ne’e.
Prezidente Konsellu Rádiu Komunidade Kolelemai Sahe Bucoi, sente kontente ho vizita MAPKOMS nian tanba bele mai haree diretamente kondisaun no situasaun reál rádiu komunidade ne’e.
Iha fatin hanesan, Jestór Rádiu Komunidade Kolelemai Sahe Bucoli hato’o mós preokupasaun sira ne’ebé mak rádiu komunidade ne’e hasoru liuliu kondisaun edifísiu ne’ebé ladún di’ak, no menus de ekipamentu radiu hanesan Komputador no ekipamentu gravasaun nian.
Hatán ba preokupasaun hirak ne’e MAPKOMS nia parte toma nota ba preokupasaun sira ne’e no sei fó solusaun ba problema no difikuldade sira ne’ebé rádiu komunidade ne’e hasoru inklui rekomendasaun ne’ebé sira hato’o liuhosi orsamentu jerál estadu 2021 hodi sustenta funsionamentu serbisu iha estasaun rádiu komunidade ne’e.
Relasiona ho problema infrastrutura, ezekutivu ne’e hateten seidauk bele rezolve iha tinan 2021 maibé nafatin tau iha konsiderasaun. */Tri
