Adolmando : Graduadu Tenke iha Responsabilidade no Moral ba Sosiedade

Naunil Media (Díli), Magnífiku Reitór Universidade da Paz (UNPAZ), Adolmando Soares Amaral, informa ba antigu alunu sira iha Universidade da Paz (UNPAZ) mak simu graduadu tenke iha responsabilidade no morál ba sosiedade.

Reitor UNPAZ, Adolmando Soares Amaral, hato’o lia hirak ne’e liu husi nia diskursu iha serimónia graduasaun faze dahuluk tinan akadémiku 2020, iha Salaun UNPAZ, Sábadu (19/12).  

“Númeru antigu alunu UNPAZ nian aumenta tan sura ho ita boot sira. Ha’u husu bá ita boot sira tenke sai antigu alunu ne’ebé iha responsabilidade no moral” apela reitór ne’e.  

Tuir nia, prosesu moris ne’e dinámiku, laiha ema ida mak imajina se karik tempu ruma antigu alunu sira balun bele asume fali kna’ar nu’udar reitór, dekanu vise reitór no dosente iha UNPAZ. Tanba ne’e, importante tebes atu hatudu nafatin responsabilidade morál.

“Ha’u fiar ho matenek no konesimentu abilidade ne’ebé iha imi sei sai figura foun iha komunidade. No sosiedade nia leet, naran katak responsabilidade no morál ne’ebé imi hetan iha família no mai haburas tan iha instituisaun ne’e tenke lakan bá beibeik,” haktuir Adolmando.

Adolmando hatete, iha juñu tinan 2021, UNPAZ sei responde frakeza sira ne’ebé mak Ajénsia Nasionál ba Avaliasaun no Akreditasaun Akadémika (ANAAA) rekomenda tenke hadi’a no hasa’e ninia kualidade iha instituisaun.

Avaliasaun instituisaun ne’ebé ANAAA halo ona UNPAZ hetan akreditasaun dala ida no re-akreditasaun mós dala ida no to’o agora UNPAZ ne’e seidauk iha kapasidade atu muda no transforma ninia estatutu hosi great C bá B.

“Ita iha frakeza ne’ebé mak peritu sira hosi ANAAA rekomendasaun kuandu hakarak hasa’e kualidade iha instituisaun ne’e ita tenke muda mentalidade ida uluk ne’ebé hanorin estudante tuir ita nia hakarak, ne’e labele akontese tan iha UNPAZ,” Adolmando afirma.

Nia dehan kuandu ema hotu iha UNPAZ ne’e mak hamrok duni bá kualidade dalan ida de’it mak labele alerjia bá reforma no kualidade, tenke apoiu no suporta malu no hahú ba oin prosesu ensinu aprendizajen ba estudante sira tenke iha ona uniforme.

UNPAZ sei garante bá merkadu atu bele kontinua mantén sira-nia pozisaun katak UNPAZ mak di’ak liu ona ba sira ho transformasaun estatutu hosi great C ba B no reforma kualidade ne’ebé atu realiza iha tinan oin sei garante duni UNPAZ ninia dignidade iha públiku nia matan. “No Atu ba To’o iha greit (A) ita hotu hotu iha ne’e labele alergia ba reforma no kualidade maibé ita tenke apoiu malu” Nia hakotu.Dvo