Inundasaun Iha Manufahi : Uma-Kain 26 Benefisia Apoia Emerjénsia Husi KJRD
Naunil Media (Manufahi), Segunda (21/12) ne’e, Komite Jestaun Risku Dezastre (KJRD) servisu hamutuk ho Bombeirus Munisípiu Ainaru distribui nesesidade báziku ho karakter emerjénsia ba komunidade uma-kain 26 afeitadu inundasaun.
Komunidadae sira ne’e pretense aldeia Susurai, suku Betanu, postu Administrativu Same.
Koordenadór KJRD, Elezito Da Costa Maçhado, hateten apoiu refere ba komunidade sira atu aguenta, hanesan fó korajen ba komunidade afeitadu.
“Ai-han emerjénsia mak hanesan fo’os saku 26, supermi, mina, ikan sardina, inklui balde ho biti”, Koordenador ne’e ba jornalista sira hafoin distribuisaun apoiu ba komunidade afeitadu iha aldeia Susurai.
Iha parte seluk Reprezentante komunidade, Aleixo Corte-Real, hateten husu ba entidade kompetente atu kria kondisaun, atu hases problema inundasaun mak akontese kada tinan.
“Maske ami simu apoiu ai-han, Hau hanesan komunidade sente triste uitoan, tanba ami tinan-tinan sempre mosu inundasaun iha ami nia aldeia, sempre fo ameasa bo’ot iha komunidade Susurai ida nee”, salient Alixo.
Manuel Das Neves, husu Ba Governu liuliu parte relevante atu tau atensaun ba iha komunidade sira tanba kada tinan inundasaun sempre akontese. Nfm
