Uma-Kain 467 Iha Suku Hatugau, Postu Letefoho Halerik Enérjia Eletrisidade
Naunil Media (Ermera), Komunidade uma-kain 467 iha Suku Hatugau, Postu Administrativu Letefoho, Munisípiu Ermera, halerik ba enérjia eletrisidade.
Preokupasaun ne’e informa husi Xefe Suku Hatugau, Miguel Madeira Saramento, ba jornalista Naunil Media hafoin partisipa programa formasaun mak organiza husi Instítuto Defeza Nacíonal (IDN), hala’o iha Centro de Convenções de Díli (CCD), Kuarta (24/12).
Suku Hatugau, kompostu husi aldeia neén (6), aldeia Hatugau Villa, Riaheu, Rialaun, Sauria ,Hunda no Kailiti.
“Durante ne’e dezemvolvimentu iha Suku Hatugau la’o, maibé ahi-enérjia eletrisidade mak halo komunidade nafatin halerik to’o agora”, informa autoridade suku Hatugau ne’e.
Kona-ba preokupasaun ne’e, Xefe Suku Hatugau, Miguel, hato’o ona proposta ba Ministériu ne’ebe tutela, maibe laiha resposta.
“Uluk hato’o ona proposta ba Governu atu husu ajuda Painel Solar, maibe nafatin laiha solusaun”, Haktuir autoridade suku ne’e.
Nia husu ba Governu liu-liu Ministériu ne’ebe tutela atu tau matan ba problema refere.
Suku Hatugau kompostu husi Aldeia neén (6) ho total populasaun 2133, husi uma-kain 467. Dms
