Klibur Juventude no Universitáriu Organiza Desportu Komunitáriu Hametin Paz Iha Suku Uaitame

Naunil Media (Vikeke), Klibur Juventude no Universitáriu Suku Uaitame (KJUSU) hola inisiativa organiza desportu komunitáriu ho objetivu atu hametin lasus amizade no paz entre komunidade iha suku refere.

Aktividade desportu komunitáriu ne’e involve modalidade voleiból feto-mane ho total ekipa (klube) 12 mai husi reprezentante sira aldeia. Aktividade ne’e realiza hodi selebra Festa Natal 2020 no Tinan Foun 2021, no sei hala’o durante semana ida, iha ne’ebe abertura ona iha loron 26 – 31 fulan Dezembru tinan ne’e.

Xefe suku Uaitame José do Rosario, hateten, atu hametin pás estabilidade iha loron natal no simu tinan foun Klibur Juventude no Universitariu Suku Uaitame (KJUSU) inisiativa loke torneiu voleivól iha Suku Uaitame. 

Liu husi deskursu abertura, Xefe suku Uaitame, José do Rosario, konvida inan-aman sira iha suku refere hamutuk ho autoridade lokál atu fó apoiu ba susesu aktividade desportu ne’e, tanba maske la hó fundu bo’ot maibe juventude no estudante bele organiza hodi hametin liu-tan lasus amiza no paz.    

“Maske sira (KJSUSU) orsamentu laiha, maibé sira lori programa desportiva mai iha ita-nia suku Uaitame hodi hametin pás iha natal no simu tinan foun ida ne’e. Tanba ne’e ita hotu-hotu presija fó apoiu ba estudante sira no inan aman suparta malu hodi torneiu entre aldeia ne’e bele la’o di’ak”, Dehan xefe José.

Tuir Xefe Suku ne’e, liuhusi eventu desportiva sira kontribui ba dezenvolvimentu suku iha kualker aspeitu.

“Jogadór sira labele hanoin de’it manán, maibé jogu ne’e suku Uaitame nian, tenki hotu-hotu fó susesu”, tenik José.

Iha fatin hanesan, Xefe juventude suku Uaitame Salvador Fernandes, agradese ba estudante no juventude sira, no konsidera importansia mak laos premiu ka taça maibe bele anima komunidade.

Prezidente Komisaun Organizadóra KJUSU, Bernate Soares da Silva, informa alien de aktividade desportu komunitáriu, estudante universitariu no juventude Uaitame sei halo limpeza jerál, semináriu, no refleksaun espíritual.

Aktividade hala’o tanba hetan apoiu husi Dom Bosco, Sekretariu Estadu Juventude no Desportu (SEJD), Gabineti Prezidensia Repúblika, Timor-Telekom (TT) no família husi suku Uaitame. Vit