PR Lú Olo Dekreta Estensaun Estadu Emerjénsia Ba Da-9
Naunil Media (Díli), Prezidente Repúblika (PR), Francisco Guterres Lú Olo, liu husi dekretu prezidensial nú…73/2020, dekreta estensaun estadu emerjénsia ba da-9, ne’ebé hahú vigora husi tuku 00.00 OTL, 3 janeiru to’o 23h59otl loron-1 fevereiru 2021.
Deklarasaun estadu emerjénsia iha teritóriu laran tomak ne’e, Xefe Estadu halo bazeia ba proposta husi Governu ne’ebé konsidera aumentu númeru kazu konfirmadu Covid-19, hamutuk 13, iha semana ikus fulan ne’e, hanesan kalamidade públika, situasaun sanitária iha Indonézia no dezenvolvimentu tipu foun SARS-CoV-2 iha nasaun seluk, inklui iha nasaun viziñu Australia no Singapura.
Jornalista Naunil Media asesu komunikadu liu husi pájina ofisial Presidência da República Democrática de Timor-Leste, 30 Dezembru 2020.
Nune’e, nesesáriu tebes hala’o nafatin lala’ok prevensaun tuir medidas sira ne’ebé Governu estabelese no tuir protókolu saúde, hodi evita propagasaun pandemia ne’e iha rai-laran.
Ho estadu emerjénsia ne’e, sei suspende no limita parsialmente ezersísiu direitu balu, husi ema ka sidadaun sira hanesan iha sirkulasaun internasionál, direitu hala’o reuniaun ka halibur malu no seluseluktan.
Molok dekreta estadu emerjénsia, Prezidente Repúblika rona uluk Konsellu Estadu no Konsellu Superior Defeza no Seguransa (28/12), ne’ebé apoiu nia iha desizaun ida ne’e. Tuir mai, Xefe Estadu husu autorizasaun husi Parlamentu Nasionál, ne’ebé, ohin (30/12), autoriza Prezidente Repúblika dekreta estadu emerjénsia ba da-9.
To’o tinan ne’e nia rohan (29/12), tuir dadus husi Ministériu Saúde, total númeru komulativu kazu konfirmadu Covid-19 iha rai-laran hamutuk 44.
Kazu sira ne’e hotu konsidera hanesan kazu importadu no to’o oras ne’e, la rejista ema mate tanba Coronavirus iha Timor-Leste. */Pau
