COVID-19 : Pasiente Nain 3 Iha Vera Cruz Reeintegra Ba Família
Naunil Media (Dili), Koordenadora Jerál Komisaun COVID-19, Dermatolojista Odete da Silva Viegas, informa pasiente na’in tolu mak baixa iha Sentru Izolamentu Vera Cruz ohin (Tersa 12 Janeiru) reeintegra ba família, maibe tenki mantein kumpri regra sira prevensaun.
“Deklara ba públiku katak, pasiente na’in tolu ne’ebé baixa iha Sentru Izolamentu Vera Cruz sei alta iha loron ohin hodi bele inkorpora ba iha família, maibe tenke kumpri nafatin medidas preventivas sira”, afirma Koordenadora Jerál Komisaun COVID-19, Dermatolojista Odete da Silva Viegas, ba jornalista sira liu husi konferensia imprensa mak hala’o iha Salaun Palásiu Das Sinzas, Kaikoli, Tersa (12/01).
Dermatolojista, informa liu-tan, ba públiku katak dadaun ne’e Governu Timor-Leste prepara ona kondisoens ba hetan vasina, tanba meius ida ne’ebé importante atu prevene pandemia COVID-19 mak liu husi vasinasaun.
“Vasina ne’ebé seguru no efetivu kontra COVID-19 mak sei sai hanesan intervensaun ne’ebé efetivu liu hodi prevene no proteje populasaun husi infesaun grave, mate no hapara surtu COVID-19. Maski Timor-Leste Laiha kazu pozetivu barak kompara ho nasaun sira seluk, ita iha direitu atu asesu mos ba vasina COVID-19 iha merkadu internasionál hodi asegura katak ita-nia nasaun lahusik ba kotuk tamba nasaun riku hotu buka dalan atu kompete ba sosa vasina”, esplika Doutora Odete da Silva Viegas.
Nia haktuir, tuir rekomendasaun husi Organizasaun Mundiál Saúde (OMS) katak vasina ne’ebé apropriadu atu bele aplika iha Timor-Leste mak ArstraZeneca’s, ho razaun katak vasina ne’e bele rai iha jeleira ho temperatura 2-8 ͦC, kondisaun ida ne’ebé mak fasilidade saude sira teritoriu laran tomak iha no uza hodi rai vasina rotina sira seluk.
“Folin baratu, produsaun masál hahú tiha ona, uza mós iha nasaun barak, Hetan ona pre-kualifikasaun husi OMS no EU. Tuir planu faze dahuluk sei introduz ba pursentu 20 husi populasaun, inklui traballadór saude no liña frente sira hotu, grupu risku, grupu vulnerável”, subliña koordenadora ne’e.
Ikus, Nia dehan, kampaña imunizasaun ne’e rasik provavelmente sei hahú iha fulan maio 2021.
Dadus 12 de Janeiro 2021 : Komulativu kazu : 49, Kazu Foun : 0, Rekuperadu Foun : 3, Komulativu Rekuperadu : 48 no Atuál Baixa : 5. Dul/Ipe
