Deputadu Adriano Preokupa Governu Reativa Aktividade Eskolar
Naunil Media (Díli), Prezidente Komisaun Polítika Partidu Demokrátika (PD) no atual membru Parlamentu Nasionál kinta lejislatura, Deputadu Adriano Do Nacimento ‘Loro Mau’ preokupa polítika Governu konstitusionál da-ualu, tanba reativa aktividade eskolar iha teritóriu nasionál, maske surtuq mundial COVID-19 kontinua ameasa ba Timor-Leste.
Reprezentante povu iha Uma Fukun Parlamentu Nasionál, Loro Mau, foti kestaun ne’e liu husi intervensaun polítika iha plenária, Segunda (18/01).
Relasiona ho nasaun viziñu Indonézia, iha provinsia NTT (Nusa Tenggara Timur/Timor Hosidental) númeru kazu COVID-19 aumenta às no hamate ona populasaun balun, liu-liu hela besik fronteira Mota Ain, hanesan Atambua Betu.
VIII Governu konstituisional hola ona desijaun atu reativa fali eskola iha teritorio timor laran tomak, maibe tenke tetu no halo estudu didiak bainhira reativa eskola sira, tamba dadaun ne’e sirkulasaun pandemia COVID-19 besik liu ona fronteira Timor-Leste ho Indonézia.
“Hau preokupa Governu loke fila-fali eskola sira, ne’e hamamar fali medida sira estadu emerjénsia nian, tenke tetu didiak atu nasaun ne’e labele afeta virus ne’ebe mak dadaun invade hela mundu” Tenik Deputadu Adriano.
Deputadu esplika, Betun ne’ebe fronteira ho Suai mos dadaun ne’e sirkulasaun transmisaun lokal maka’as tebes, nune’e mos iha Atambua virus refere hamate ona madre nain rua.
“Husu ba F-FDTL, PNTL ho autoridade lokal iha fronteira Bobonaru, Suai ho Oe-Cusse, atu halo servisu kontrolu vijilansia maka’as atu evita Timor oan sira ne’ebe haka’at ba mai iha fronteira”, afirma deputadu ne’e. Latu
