Osan La-to’o, Idozu Balun Iha Lolotoe Bobonaru Seidauk Simu Subsídiu
Naunil Media (Díli), Prezidente Komisaun Polítika Partidu Demokrátika (PD) no atual membru Parlamentu Nasionál kinta lejislatura, Deputadu Adriano Do Nacimento ‘Loro Mau’, informa ferik-katuas balun iha suku Deudet, postu administrativu Lolotoe, Munisípiu Bobonaru, seidauk asesu ba direitu subsídiu idozus, tanba razaun osan la-to’o.
“Foin dadaun hau hetan chamada husi komunidade, katak ferik ho katuas lubuk ida mak seidauk asesu sira nia direitu osan idozus nian, tanba osan laiha ona” Reprezentante povu iha Uma Fukun Parlamentu Nasionál, Loro Mau, liu husi intervensaun polítika plenária, Segunda (18/01).
“Sira kontaktu mai, dehan benefisiáriu sira balun simu lakompletu, tanba razaun mak osan la-to’o” tenik deputadu ne’e.
Deputadu Loro Mau, hatutan, problema hanesan, akontese mos iha postu administrativu Fatumea munisípiu Covalima, ferik-katuas balun seidauk simu direitu subsídiu idozus.
Iha Fatin hanesan Deputada Bankada CNRT, Virginia Ana Soares, hateten benefisiáriu sira balun iha postu Lolotoe durante tinan ida ona seidauk asesu direitu subsídiu idozus.
“Husu ba governu liu-liu Ministériu ne’ebe tutela tenke tau atensaun máxima ba situasaun ida ne’e”, afirma Deputada Virginia Ana Soares.
Suku Deodet iha aldeia sira mak hanesan aldeia Bou-Tal, Gole, Oe-Laca. Chy
