Lingua Hanesan Valor Kultural ka Hanesan Meius Komunikasaun Hodi Komunika ho Ema Seluk
Naunil Media (Díli), Merício Juvinal dos Reis “AKARA”, hateten, lingua ne’e importante atu transmite matenek no esperiénsia ne’ebé iha, tantu direita ka eskrita, hodi refleta ba iha kapasidade bainhira halo relatóriu ka notísia ne’ebé ho di’ak.
Afirmasaun ne’e hato’o husi Sekretáriu Estadu ba Komunikasaun Sosiál, Merício Juvinal dos Reis “AKARA”, bainhira loke ofisialmente Faze daruak Prejetu “Konsultóriu Lingua ba Jornalista” (CLJ-Sigla Portugés), tersa-feira, loron 19 fulan-janeiru tinan 2021, iha Auditórium-PCM, Palásiu Governu, Tersa (19/01).
“Ha’u husu ona Formadór sira atu hanorin lingua ba jornalista sira ho kualidade ne’ebé mak a’as. Hanesan ha’u rona ona husi Konsultóriu Lingua Portugés, sira dehan progresu ne’ebé mak ita hetan durante ne’e di’ak, sira ne’ebé mak tuir, sira ne’ebé hakerek notísia hanesan, TATOLI, RTTL, GMN, Timor Post no media sira seluk. Pursentu 80 hakerek di’ak ona maibe presiza tan kompleta di’ak liu tan” tenik AKARA.
Lidér maximu ne’e hateten, CEFTEC tenki sai sentru ne’ebé exelente, sentru ne’ebé tenke servisu ho ekipa ne’ebé forte iha esperiénsia no matenek. Governante ne’e realsa, Lingua Portugés hanesan lingua ofisiál, tanba ne’e jornalista sira tenke aproveita aprende no hakerek hodi bele hatene.
Aleinde ne’e, Diretór Nasionál Centru formasaun Teknika iha Komunikasaun (CEFTEC-Sigla Portugés), Luis Evaristo hateten, depois de partisipa formasaun, formandu sira iha ona konesimentu klean oinsa hakerek notísia ho Lingua Portugés ho kualidade tuir padraun jornalizmu nian.
Diretór ne’e, husu ba dirijenti media sira atu kopera no garante nafatin partisipasaun formandu sira iha periôdu ida ne’e no kontribui kualidade informasaun ba Instituisaun media ida-idak nian rasik liuliu utilizasaun Lingua Portugés hanesan lingua ofisiál Timor ne’e nian.*/Tri
