FEATUREDIkus LiuNewsSeguransa

Lere Husu Governu Taka Totalmente Fronteira

Fahe Tutan

Naunil Media (Díli), Xefe Estadu Maior Jenerál FALINTIL-FDTL, Major Jenerál Lere Anan Timur, husu Governu taka totalmente fronteira no tenke implementa medidas Estadu Emerjénsia hodi prevene no kontrolu COVID-19.

Eis-gerileiru rejistensia komandante rejiaun um ponta leste, Lere Anan Timur, ba jornalista sira hafoin audensia ho Prezidente Repúblika (PR), Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kuarta (27/01).

Líder FALINTIL-FDTL, hateten instituisaun F-FDTL no PNTL mak reforsa seguransa iha área fronteira preokupa tebes ho evolusaun situasaun epidemiolójika no proliferasaun kazu rejistadu ho COVID-19 aumenta husi loron ba loron, liuliu iha Nusa Tenggara Timur ne’ebé Timor-Leste fahe nia fronteira-rai hamutuk:

“Ami-nia preokupasaun mak tenke implementa medidas ne’ebé sai husi Governu. Ida taka totalmente fronteira, ema ida la sai, ema ida la tama. Hanesan portu no aeroportu. Segundu, intistuisaun seguransa rua sei reforsa iha fronteira. Terseiru, Governu tenke toma medidas fortes ba sira ne’ebé kontra ordem, liuliu sira ne’ebé iha fronteira. Labele hanesan uluk-uluk, kaer tama kuarentena, estadu selu tan nia kuarentena, fo tan hahán. Depois husik fali. Tenke kriminaliza tanba lori moras. Kuartu, sosializasaun ba ita-nia komunidade, kuandu ilegál ruma tama, husu ba inan aman sira, família sira lori mai aprezenta iha saúde,” Major Jenerál Lere Anan Timur informa.

Xefe Estadu Maior Jenerál husu ba Prezidente Repúblika, nu’udar mós Komandante Superior Forsas Armadas nian katak instituisaun F-FDTL no PNTL iha fronteira-rai presiza hetan apoiu liután tanba laiha kondisaun di’ak atu hala’o nia funsaun reforsa seguransa hodi prevene moras importadu, COVID-19, hadaet mai Timor-Leste.

Xefe Estadu Maior Jenerál husu ba Governu atu aplika sansaun ba sidadaun sira ne’ebé tama no sai ilegalmente mai territóriu nasionál tanba bele hamosu kalamidade públika. Xefe Estadu Maior Jenerál nia preokupasaun ne’e haree ba kazu pozitivu iha Atambua, husi loron ba loron aumenta babeibeik. Tanba ne’e ho aplikasaun sansaun bele prevene sidadaun sira halo pasajen ilegal.

Veteranu 24 anos ne’e dehan, fronteira-rai ne’ebé luan no naruk difikulta instuisaun seguransa atu bele iha kontrolu ba pasajen ilegál, tanba ne’e Xefe Estadu Maior Jenerál husu Governu atu hala’o sosializasaun ba komunidade sira ne’ebé hela iha área fronteira atu iha papél taumatan ba seguransa ba prevensaun COVID-19.

Prezidente Repúblika, horseik, hafoin rona Konsellu Superior Defeza no Seguransa no Konsellu Estadu, haruka pedidu autorizasaun ba Parlamentu Nasionál atu estende estadu emerjénsia dasanuluk.

Bainhira Parlamentu Nasionál aprova pedidu estensaun Estadu Emerjénsia, Prezidente Repúblika sei dekreta.

Hafoin Prezidente Repúblika dekreta, Governu sei hasai medidas implementasaun Estadu Emerjénsia. Latu

Leave a Reply

Your email address will not be published. Required fields are marked *