Médiku Nasional Sensibiliza Moras Hadaet no La Hadaet Ba PNTL Manufahi
Naunil Media (Manufahi), Tersa (26/01) ne’e, ekipa ida husi Saúde Nasionál partilla informasaun kona-ba ‘Moras Hadaet no Moras La Hadaet’ ba PNTL Munisípiu Manufahi durante loron ida.
Programa sensibilizasaun mak hala’o iha Salaun PNTL Munisípiu Manufahi, hetan partisipa husi Komandante Esquadra nain-4 no membru hotu mak lokaliza iha Manufahi.
Liu husi deskursu abertura, Reprezentante ekipa Médiku Nasionál, Analita do Rego Carlos Fatima, informa aktividade refere sira hala’o haleu munisípiu 12 inklui RAEOA (Reziaun Administrativa Espesial Oe-Cuse Ambeno), enkuatu remata ho munisípiu Vikeke no Manufahi.
“Materia balun atu fahe ba ita bo’ot sira ‘Moras Hadaet No La Hadaet’; Ezemplu : moras hadaet, hanesan HIV/SIDA, Hepatitis, COVID-19 no seluk-tan, perigozu no fó ameasa ba vida ema nian”, hateten reprezentante ekipa médiku nasionál ne’e.
Nia informa liu-tan, sei iha konsulta jerál ba membru PNTL ho família mak hakarak tarata saúde, atu redus moras, liu-liu moras hadaet iha Timor.
Iha fatin hanesan, Komandante PNTL Munisipiu Manufahi, Superintendente Joni Viana das Regras, orgullu ho prezensa médiku partilla hanoin balun ligado moras hadaet no la hadaet.
“PNTL númeru mortalidade ne’e às tebes, tanba atu tama ona ema nain 200 ne’ebé mak husik ona mundu ida ne’e kauza husi moras sira ne’ebé mak Doutora sira esplika”, nia subliña.
“Husu ba membru sira hotu labele subar moras, oportunidade diak ba ita atu trata moras”, afirna komandante ne’e. Nfm
