FEATUREDIkus LiuNewsPolitika

PR Lú Olo Dekreta EE Ba Dala-10

Fahe Tutan

Naunil Media (Díli), Prezidente Republika (PR), Francisco Guterres ‘Lú Olo’, dekretu ona Estadu Emerjénsia (EE) ba dala 10.

Liu husi komunikadu imprensa mak Naunil Media asesu husi Media Palasiu PR Kinta (28/01/2021), hatete PR dekreta tan ona Estadu Emerjénsia ba dala 10 atu halo prevensaun ba surtu mundial COVID-19 iha rai-laran.

Xefe Estadu Timor-Leste, Lú Olo, iha 27 Janeiru 2021, dekreta Estadu Emerjénsia dasanuluk ba loron tolu-nulu (30), hahu husi tuku 00:00 iha 2 fevereiru 2021 (Tersa feira) no termina iha tuku 23:59 iha 3 Marsu 2021 (Kuarta feira).

Estensaun no deklarasaun ba Estadu Emerjénsia mai ho fundamentu iha subsistensia ba situasaun kalamidade públika.

Prezidente Republika dekreta Estadu Emerjensia hafoin pedidu estensaun aprova iha Parlamentu Nasional ohin. Horseik, Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasional estensaun Estadu Emerjénsia dala-sanuluk.

Pedidu Governu ba estensaun Estadu Emerjénsia, tanba haree ba evolusaun sidadaun sira nian preokupasaun ba situasaun epidemiolójika no proliferasaun kazu rejistadu aumenta iha nível rejional no nível mundial.

Iha nível mundial, tuir Organizasaun Mundial Saude (WHO-Sigla Ingles), iha 26 janeiru 2021 rejista kazu konfirmadu liu 100,250,000 (milaun atus ida rihun rua nulu resin lima-nulu) no liu 2,100,000 (milaun rua rihun atus ida) mak mate.

“Iha Republika Indonézia, ita-nia vizinu no belun, rejista kazu konfirmadu liu milloens ida ho infesoins husi SARS-CoV-2 no liu 28,000 mak mate tanba COVID-19. Iha provinsia Nusa Tenggara Timur (NTT) kazu infesaun konfirmadu liu 4000 (rihun haat) no hamate ona ema nain 110 (atus ida sanulu).” Jatak nia. Deklarasaun Estadu Emerjénsia sei abranje territoriu nasional tomak.

Estadu emerjénsia sei parsialmente suspende direitus ba sirkulasaun internasional, liberdade sirkulasaun no fixasaun rezidensia ba kualker pontu iha territoriu nasional, direitu reuniaun no manifestasoins, liberdade ba kultu, no direitu propriedade no inisiativa ekonomika privada.

Autoridades publikas kompetentes sei impoin restrisoins nesesrias ba redusaun risku hadaet nian no ezekuta medidas prevensaun no kombate pandemia, hanesan distansiamentu sosial kuarentena ba suspeitu infesaun, izolamente ba moras no suspeitus, konfinamentu domisiliariu, uzu obrigatoriu maskara, fase-liman no distansia fízika.

Desde fulan Marsu, hafoin rejista kazu konfirmadu ida ho SARS CoV-2 Timor-Leste implementa kedas Estadu Emerjensia atu fo kbiit ba governu atu foti medidas prevensaun no kontrolu hodi hases sidadaun hotu-hotu husi kalamidade publika neebe bele mosu husi moras COVID-19.Ohin loron Timor-Leste rejista kazu pozitivu hamutuk nain-18. Desde Marsu 2020 too ohin loron, kazu konfirmadu ho SARS-CoV-2 hamutuk nain 68, rekuperadu nain-50 no laiha ema ida mak mate.*/Pau

Leave a Reply

Your email address will not be published. Required fields are marked *