UPF Salva Milítar Indonézia Nain 13 Iha Tasi
Naunil Media (Díli), Porta-voz Komandu Jerál PNTL, Superitendente Xefe Polísia, Arnaldo de Araújo, informa PNTL liuhusi Unidade Polísia Fronteira (UPF) salva Exército Nacional Indonésio (TNI–Sigla Melayu Indonézia) nain 13 iha tasi Oenopu, Bairru Kabu Lubu, aldeia Citrana, suku Bene-Ufe, Sub-Rejiau Nitibe RAEOA (Rejiaun Administrativa Espesial Oe-Cusse Ambeno), tanba laloran tasi.
Superintedente Xefe Polísia Arnaldo de Araújo ba jornalista sira liu husi komferensia imprensa, iha salaun PNTL Kaikoli, Sesta (29/01).
Porta voz Xefe Polísia Arnaldo, haktuir iha loron 27 Janeiru, oras 13:15 akontese situasaun balun ne’ebé afeta ba milítar Indonézia servisu iha foho Sinai, milítar Indonézia sira mai hola sasán iha Kupang, hola tiha sasán sira atu fila ba Sinai, laloran tasi bo’ot baku sira no muda tiha sira mai iha área Citrana nian.
“Depois ita-nia komandu polísia munisípiu Oe-kuse eskuadra Citrana servisu hamutuk ho UPF ba salva no foti kedas TNI sira-nia identidade, pois kontaktu kedas mai konsuladu TNI nian ne’ebé destaka iha Oe-Kuse ne’ebá halo tiha kordensaun di’ak no buat hotu kontroladu, hafoin ita haruka fila membru TNI nain 13 fila ho kondisaun di’ak”, dehan porta voz Arnaldo.
Porta vos ne’e hatutan, TNI ne’ebé tama leet mai Timor-Leste la konsidera hanesan tama ilegal, maibé ne’e hanesan asidente ida ne’ebé sira mai ho kareta espik la uza farda no la iha buat ida, sira mai atu halo kompras iha Oepoli ne’ebé balija ho sitrana Oe-Kuse.
“Molok ita passa revista ba identidedade TNI sira-nia no haree katak buat hotu la’o ho di’ak no kontorladu ita haruka fila sira, TNI sira mós agradese ba ita tanba ita halo kordesaun no kopersaun ne’ebé di’ak tebes”. Tenik nia.
Ikus nia dehan, durante ne’e parte seguransa Timor-Leste iha liña kordenasaun no koperasaun di’ak ho TNI sira iha liña fronteria para bele hala’o buat hotu-hotu ho kontoladu. Nel/Flo
