Marí Alkatiri Hahu Subar Àn Iha Meza Okos

Naunil Media (Díli), Porta-voz Bankada Parlamentar CNRT, Deputadu Leonardo Lobato, hateten hafoin rona Prezidente partidu Congreco Nacional Reconstrução Timorense-CNRT no Comição Política Nacional (CPN) CNRT, Kay Rala Xanana Gusmão mak sei hatán iha tribunal, Marí Alkatiri hahu subar àn iha bankada FRETILIN nia-meza okos.

Porta-voz Deputadu Leonardo Lobato, deklara liu husi konferensia imprensa mak hala’o iha Sala bankada CNRT, Parlamentu Nasionál, Kuarta (27/01).

Konferensia imprensa ne’e hodi hatan bankada FRETILIN fó sai liu husi komunikadu imprensa hateten “CPN-CNRT hanesan labarik ki’ik, ne’ebe halo tiha sala ba subar iha inan nia-saia”.   

Deputadu Leonardo Lobato, reafirma “Tanba depois de rona maun bo’ot Kay Rala Xanana Gusmão mak sei ba hatán iha tribunal, halo Marí Alkatiri halai ba subar tiha iha bankada Fretilin nia-meza okos”.  

“CPN ne’e órgaun koletivu ida ne’ebé liderta husi  Prezidente Partidu CNRT  Kay Rala Xanana Gusmão, tanba ne’e prezidente partidu mós nu’udar prezidente CPN iha obrigasaun atu responsabiliza ba desizaun no asaun ne’ebé CPN foti hodi hasoru Marí Alkatiri”, esplika porta-voz ne’e.  

Deputadu ne’e dehan, desizaun  ne’e  la’ós  foti naran-naran, maibé foti liu husi deliberasaun reuniaun CPN mak prezide husi prezidente CPN-CNRT Xanana.

Tanba ne’e Marí Alkatiri ba hato’o keixa  iha Ministériu Públiku hasoru CPN-CNRT signifika katak líder masimu husi órgaun CPN-CNRT mak sei responsabliza, nune’e CPN-CNRT bolu atensaun ba publiku katak Prezidente CPN-CNRT mak sei ba hatán  Mari Alkatiri. 

 “CPN-CNRT la halo akuzasaun direita hasoru Marí Alkatiri relasiona ho subornu ne’ebé Marí Alkatiri simu husi konpania ConocoPhillips, maibé CPN-CNRT apenas divulga dokumentu legal ne’ebé apresenta husi oceanic exploration hasoru ConocoPhillips”, tenik deputadu ne’e

Konferensia imprensa ne’e partisipa husi vise-xefe bankada, Patrocino, deputadu Arao Noe, deputada Carmelita Caetano Moniz no sira seluk.  Flo/Ipe