Kondisaun Sala Aula EBF Usuvasu Grave
Naunil Media (Lautém), Kondisaun Eskola Bázika Filial (EBF) iha aldeia Usuvasu, suku Barikafa, postu administrativu Luro, Munisípiu Lautém, dadaun ne’e ho kondisaun grave tebes, tanba ne’e parte eskola husu ba Governu konstitusionál da-ualu liu Ministériu Edukasaun Juventude no Desportu (MEJD) atu fó atensaun.
“Tinan barak ona Eskola Bázika Filial Usuvasu labele hala’o aktividade aprendizajen ho di’ak, pior liu mak iha tempu udan aktividade aprendizajen laiha tanba uma eskola nia-kakuluk no didin ho piku kondisaun grave”, Kestaun ne’e informa husi Koordenador EBF Usuvasu, Domingos Pinto da Graça, ba jornalista Naunil Media iha nia-knaar fatin, Kinta (04/02).
Koordenadór ne’e haktuir, preokupasaun refere parte eskola hato’o ona proposta ba inspetur edukasaun postu administrativu Luro atu hatutan maibé seidauk hetan resposta husi MEJD.
“Husu ba Governu liu-liu ba Ministériu Edukasaun atu hadi’ak eskola ne’e, nune’e aktividade ensinu aprendizajen bele la’o, tanba iha tempu udan bee tama”, koodenadór eskola EBF Usuvasu preokupa.
Nia dehan, kona-ba material hanesan kadeira, meza sufisiente hela, eskola mos Biblioteka maibé livru la sufisiente e kondisaun grave, tanba hetan estragus husi anin bo’ot.
EBF Usuvasu harii iha tinan 2007, estudante primeiru ano no terseiru ano ho total 29, professores nain tolu (3) kompostu husi voluntáriu nain rua (2) no permanente nain ida (1). Dvo
