Públiku Labele Fiar Ba Rumores Osan Laiha, PM Taur: “Ami Mak Ka’er Dapur”
Naunil Media (Díli), Relasiona ho preokupasaun públiku osan laiha, átual Primeiru Ministru (PM), Taur Matan Ruak deklara, informasaun sira ne’e falsu, bainhira orsamentu menus governu sei halo levantamentu tanba ne’e labele fiar rumores fiar ba governu.
Xefe Ezekutivu Taur Matan Ruak ba jornalista sira hafoin sorumutu semanal ho Prezidenti Repúblika (PR) Francisco Guterres ‘Lú Olo’, iha Palasiu Prezidente Nicolau Lobato, Bairru Pité, kinta (18/02).
“Ami mak kaer dapur ne’e. Loloos ne’e, ami mak dehan hahán laiha ona ka sei iha. Orsamentu iha Ministériu Finansas (MF) sei sufisiente atu sustenta ba mákina Estadu, no bainhira osan menus ona mak governu sei halo levantamentu”, dehan Xefe Ezekutivu Taur.
Xefe Ezekutivu ne’e hatutan, ida ne’e nu’udar aktu normál ne’ebé halo desde governu sira anteriór, tanba ne’e nia husu lalika preokupa ho rumores refere. Bazeia ba analiza hosi ekonomista sira nian kona-ba orsamentu 200 milloins iha tezouru ne’e só bele de’it sustenta Ministériu ida, oinsá ho Ministériu seluk-seluk no governu garante ka lae funsionamentu mákina Estadu?
“Ha’u hanoin ita-boot sira (jornalista) rona demais sira iha li’ur, la rona governu ne’e, fila ba fila mai ita-boot sira preokupa dehan governu osan laiha. Ami mak kaer dapur ne’e loloos ne’e ami mak dehan hahán laiha ona ka sei iha. Ita-Boot sira han ne’e mak preokupa lahalimar ne’e”. Eis Prezidente Repúblika ne’e informa
Eis Jeneral Taur afirma,”Más prontu hakarak hateten informasaun ne’ebé ha’u simu hosi Ministériu Finansas seidauk iha nesesidade atu halo levantamentu, mas kuandu nesesidade obriga sei halo! Tanba ne’e lalika preokupa ho ida ne’e”.
PM Taur dehan, bainhira atraza orsamentu 2021 ninian bele implika ba iha programa dezenvolvimentu nian, maibé seidauk iha implikasaun, seidauk afeta, imposivel governu ida nia halo tiha programa, tau tiha orsamentu depois nia lakohi implementa fali ne’e imposivel, lójika laiha ne’e.
“Ne’ebé ha’u hanoin ita-boot sira lalika rona rumores sira la’o tun la’o sa’e ne’e, tanba ema dehan Timor ne’e ema matenek tan-tanan de’it. maibé ita levanta kestaun sira ne’e ema dehan fali la’ós matenek karik ne’e keta beik karik, ne’ebé lalika preokupa, laiha, quando uma vez que presija governu naturalmente sei foti, ne’ebé laiha problema”. tenik Taur. Pau
