TL Rejista kazu Covid-19 lokal ‘4’ transmiti husi sidadaun Ba-Mai Atambua
Naunil Media (Dili), Kordenador Forsa Tarefa Prevensaun no Mitigasaun Surtu Covid-19, Rui Maria de Araújo, deklara Timor-Leste rejista tan kazu pozitivu Covid-19 foun hamutuk na’in 4 iha Frontera Munisipiu Kovalima.
Responsavel forsa tarefa no Mitigasaun ne’e deklara kazu komfirmadu nain haat ne’e, transmiti husi sidadaun ne’ebé tama sai husi liña fronteira Indonesia ho Timor Leste.
“Kazu hirak ne’e deteta hahú husi amostra rastreiu ka screening ne’ebé foti iha dia 20 Fevereiru 2021. Hafoin, ohin loron, ekipa vijilánsia epidemiolójika buka tuir ninia kontaku sira to’o ohin loraik hamutuk 29 pessoas membru familia nain 13, inklui viziñu sira ema 16. Sidadaun nain 4 ne’ebé positivu tan, rua membru familia, nain rua seluk viziñu” dehan Rui Maria ba jornalista sira iha sala De Situação Centro Integrado Gestão De Crise CCD. (23/02/2021).
Nia haktuir “Kazu positivu foun nain haat ne’e hatudu transmisaun lokal husi posivelmente kazu importadu klandestinamente husi populasaun ne’ebé tama sai fronteira” hatutan Rui Maria.
Kordenador ne’e klarifika sidadaun hirak ne’e, mai husi Aldeia Klauhalek, Suku Belulik Leten, Postu Administrativu Fatumean, Munisipiu Kovalima.
“Ekipa vijiansia epidemiolójika ho ekipa laboratóriu, nafatin buka tuir kontaktu sira hodi halo análize ba sira nia amostra.”, nia deklara
Enkuantu tuir dadus jeral 23/02/2021 Kazu konfirmadu foun: 4, kazu rekupera: 0. Kazu ativu: 21 mais 4. Total ema iha kuarentena: 190
Tuir dadus husi teste jeral rastreiu ka screening ne’ebé halo iha Munisipiu Covalima, Bobonaro ho RAEOA: Bobonaro total amostra 1022, 100% resultadu negativu, Covalima total amostra 851 husi total ne’e nain 4 Pozitivu , nain 847 negativu, husi RAEOA total amostra 252, 100% resultadu negativu .
Hare husi nivel alerta no resposta ne’ebé Governo Timor-Leste adopta ba prevensaun no mitigasaun Covid-19 iha Timor-Leste, hahú ohin 23 de Fevereiru 2021, Timor-Leste tama fali faze ne’ebé hanaran ALERTA 3 ka faze “mitigasaun”, Serka Sanitária sel matein nafatin, tuir rezolusaun governu n°4 / nú.95, 15 Fevereiru 2021.IVO
