Deskuti Bee Dalan, Deskonfia Lejada DPA ‘Buti’ Arguidu AA Nia-Oin Hatan Iha TDD

Naunil Media (Díli), Deskonfia lejada inisial DPA ‘buti’ arguidu inisial AA nia oin lulik  tanba mosu diskusaun ba  bee dalan nune’e hata iha TribunáL Distritál Díli (TDD),  krime ofensas integridade Fízika simples ne’ebé previstu iha artigu 145.

Tuir provas ne’ebé lee sai husi juíza katak, iha loron 28 fulan marsu tinan 2020, oras tuku 10htl, lejada hadia hela bee dalan iha nia uma oin. Derepente arguidu ho nia aman sai hodi bolu dehan hoe! Nune’e lejada mós hatan katak, ita bo’ot bolu se? hafoin ida ne’e hamosu diskusaun entre arguidu ho lejada.

Iha diskusaun nia laran, arguidu AA ba besik lejada, hodi nia liman, buti maka’as lejada nia kakorok  no dudu lejada bomu ba rai, nune’e rezulta lejada hetan kanek no ran sai maka’as iha liman sikun no ain parte karuk.

Maibé, iha prosesu julgamentu ne’e, arguidu konfesa ba tribunál katak, nia labaku lejada. Maibé  lejada tolok arguidu nia inan-aman, entaun arguidu ba besik hodi fó motivasaun maka, lejada foti ai-suak hodi baku ba arguidu no buti arguidu nia oin lulik, maka arguidu liki lejada hodi monu no kanek.

“Ha’u la baku nia, maibé nia tolok ha’u-nia inan-aman maka ha’u ba besik hodi fó motivasaun ba nia, maka nia lori ai-suak hodi baku ba ha’u no buti ha’u nia oin lulik ho liman loos to’o ha’u hakilar iis laiha, ho ida ne’e, ha’u salva ha’u nia-an hodi liki nia, nia nain rasik monu no kanek”.  arguidu AA komfesa iha sala julamentu, Tribunal Distrital Dili, segunda (22/02).

Iha julgamentu  ne’e lejada DPA komfesa, jura no hato’o katak arguidu bosok no bobar lia,  tanba lejada ho arguidu nia aman diskuti hela konaba bee dalan, maka arguidu halai sai husi uma, hodi buti lejada nia kakorok no lejada monu. Maibé lejada haree arguidu sei hamrik hela nia oin maka nia buti arguidu nia oin lulik para arguidu ses tiha.

“Nia bosok no bobar lia ba ha’u, maibé ha’u diskuti hela ho AA nia aman maka, AA halai sai husi nia uma hodi buti ha’u nia kakorok no ha’u monu, entaun nia sei  hamriik hela ha’u nia oin atu oho ha’u ga halo nusa karik, ne’e maka ha’u buti nia oin lulik para nia atu ses husi ha’u,” hateten lejada.

Lejada AA hatutan tan, depois nia buti tiha arguidu nia oin lulik ho liman loos,  arguidu nonok no lahalo asaun ruma, maibé lejada rasik husik mesak no hato’o keixa ba xefe aldeia hafoin telefone Polísia Nasionál Timor-Leste (PNTL).

“Ha’u monu tiha iha bee dalan kuak ne’e, ha’u hader mai maka buti nia oin lulik. Maibé nia lahakilar ho nonok de’it, ha’u maka husik rasik hafoin nia ses, ha’u hamrik ba fó hatene xefe aldeia hodi telefone polisia”. lejada AA esplika.

Prosesu julgamentu ne’e, sei kontinua iha loron 26 fulan Fevereiru tinan ne’e, hodi rona testemuña.

Entretantu julgamentu ne’e prejidi husi juíza singular Anapaula Fonseca, Ministériu Públiku reprezenta husi prokuradór Jerál Claudino do Rosario, arguidu hetan asistensia legál husi Defensor Públiku Sebastião Amado. Rit