Henrique : Hahú Marsu OPS Sei Tama Komunidade Nia-Uma Identifika Problema

Naunil Media (Díli), Komandante Polísia Nasionál Timor-Leste (PNTL) munisípiu Díli Superintendente Xefe Polísia Henrique da Costa, informa  hahú fulan Marsu Ofisial Polísia Suku (OPS) iha munisípiu Díli sei tama sai komunidade sira nia-uma, hodi identifika problema saida komunidade hasoru.

Komandante PNTL munisípiu Díli Superintendente Xefe Polísia Henrique da Costa ba jornalista sira hafoin enkontru advokasia ho OPS nain-36 no lansamentu livru formatu vijita  suku, iha  salaun PNTL,  Kaikoli, sexta (26/02).

Superintendente Xefe Polisia Henrique  haktuir, objetivu husi livru ne’e  sai hanesan estratejia komandu munisípiu nian, atu   polísia hakbesik an ba komunidade nian leet hodi identifika problema.  

“Hahú marsu agora OPS sira sei tama sai uma iha ida-idak nian área para bele ko’alia diretamente ho komunidade sira. Ho ida ne’e ita identifika tiha dadus hodi haree ita-nia komunidade infrenta problema saida, ita bele hatene katak krimi saida mak sempre akontese iha sira-nia área. Depois  ida ne’e mai iha parte komandu para ita bele haree no foti medida hodi halo prevenesaun  redus krimi iha ida-idak nian área”, dehan Henrique.

Nia hatutan, iha formatu imprime ba livru ne’e PNTL hetan apoiu husi Asian Fundation nian distribui ona ba  OPS sira atu  bele uza. Hein  relatóriu  ka dadus  informasaun sira ne’ebé sira OPS hatama ba iha livru, sei hatama mai iha parte eskuadra, sei kontinua hatama mai iha komandu munisípiu.

Komadante munisípiu Díli ne’e dehan, atu halakon krimi ne’e imposibel, maibé  presija buka meius onisa prevene krimi. Maibe, la’ós prevene de’it tenki koloka membru OPS sira nian presenja iha komunidade sira nian leet atu  komunidade bele sente seguru. Nel/Emj7