PN Renovasaun EE Dala-11, Fó Kbiit Ba Governu Prevensaun Covid-19 iha TL
Naunil Media (Díli), Iha segunda (01/03) ne’e, Parlamentu Nasionál (PN) plenaria estraórdinaria aprova ona pedidu renovasaun Estadu Emerjénsia (EE) ba dala-11 ba teritóriu tomak, ho votu nominál afavor 53, kontra 0 no abstensaun 6, hodi fó kbiit ba governu halo prevensaun Covid-19 iha Timor-Leste (TL).
Tuir Primeiru-Ministru (PM), Taur Matan Ruak, hodi governu nia naran solidariza populasaun sira iha fronteriza hanesan Bobonaru, Kovalima no Rejiaun Administrativa Espesial Oe kusi Ambeno (RAEOA), no husu atu sakrifisiu uitoan hodi evita iha kazu mate tanba COVID-19.
“Renovasaun estadu emerjésia ba dala-11 ne’e atu fó kbiit ba ami Governu liuhusi Sala Situasaun halo prevensaun no mitigasaun kona-ba propagasaun surtu KOVID-19 nian, liuliu ba zona fronteriza hanesan Bobonaro, Kovalima no Oekusi, ne’ebé iha hela risku provavel ba tranzmisaun lokál”, dehan PM, Taur Matan Ruak ba jornalista sira iha sala plenaria ba debate renovasaun EE 11, iha Parlamentu Nasionál, segunda ne’e.
Xefe zekutivu ne’e afirma, kompromete ba membru Parlamentu sira katak, governu sei kontinua esforsu tuir posibilidade ne’ebé iha atu evita sidadaun sira labele mate tanba KOVID-19, nune’e mós tanba hamlaha, nomós husu atu pasiénsia uitoan hodi hein prosesu vasinasaun ne’ebé iha hela prosesu laran, ne’ebé la kleur tan sei implementa.
“Governu solidariza tomak ba sakrifisiu tomak ne’ebé populasaun sira iha fonteira daudaun ne’e pasa, ita Ia iha dalan seluk. Husu ba inan-aman sira hotu iha ne’ebé deit, liuliu sira ne’ebé iha liña fronteira no iha ligasaun ho viziñu sorin balun (Nusa Tengara Timur NTT), parake halo sakrifisiu dala ida tan, hodi ita hotu evita ita-nia ema sira mate tanba moras KOVID-19”, Taur subliña.
Ikus nia husu, agradese ba komprensaun no apoiu Parlamentu Nasional nian durante ne’e iha luta kontra KOVID-19”. Tenik Taur.
Renovasaun EE dala XI ne’e, Xefe Estadu sei deklara estensaun EE hahú hosi loron 4 fulan marsu to’o loron 2 fulan-abril tinan 2021.
Entretantu kazu KOVID-19 atuál rejista 1 marsu 2021, daudaun ne’e iha kazu pozitivu KOVID-19 ativu 23, hosi total kazu kumulativu hamutuk 113., dezde pandemia ne’e deteta dahuluk iha fulan Marsu tinan 2020, enkuantu seidauk rezista kazu Obitu. ana
