Rosario: MKAE-AIFAESA Kontrola Folin Sasán Báziku Merkadu Iha Kovalima
Naunil Media (Díli), Portavoz Ekipa servisu Covalima Vitória ho Domin-20 (EKSES- COVID-19) Rosario Dolorozo Ximenes husu, Ministériu Koordenadór Asuntu Ekonómiku (MKAE) no Autoridade Inspeksaun Fiskalizasaun ba Atividade Ekonómika Sanitária no Alimentár, Institutu Públiko (AIFAESA, I.P.) kontrola no interven folin sasán bázika merkadu sira iha munisípiu Kovalima komesa folin sasán sa’e makas ona.
Asuntu ne’e hato’o husi portavoz EKSES- COVID-19 Rosario Dolorozu Ximenes ba jornalista sira liuhusi komunikadu imprensa, iha sede RENETIL, Farol, sábadu (27/02).
“Povu Fatumea hahú infrenta menus ai-han tanba la iha ona asesu ba merkadu, no hahú susar asesu ba bee moos. Tanba ne’e, ami mós husu ba MKAE no AIFAESA kontrola no halo interven presu sasán bázika iha merkadu sira, iha Munisípiu Kovalima ne’ebé oras ne’e komesa sa’e makas ona”, dehan Rosario.
Portavoz ne’e hatutan, rekomenda ba komunidade negosiante sira, atu labele aproveita situasaun ne’e hodi hasae folin sasán iha merkadu nomós ba sira ne’ebé mak lokaliza iha área afetadu iha munisípiu Kovalima, husu mós apoiu parseiru dezenvolvimentu nasionál no internasionál atu hatudu justu soliedariedade ajuda komunidade iha Kovalima.
Tanba ne’e nia dehan, iha impedimentu ba sira-nia mobilidade iha área afetadu, nune’e husu mós ba ministériu relevante atu apoiu subsídiu nesesariu sira ba família vulneravel sira iha afeta COVID-19.
“Ne’ebé tama sai iha Munisípiu rua refere tanba ne’e Kovalima oan ejiji ba Ministeriu Saúde ( MS) atu imediatamente transfere lalais ema sira ne’ebé mak afetadu ona hosi moras COVID-19 ne’e. atu bele prevene no asegura postu Fatumean tomak”, Rosario sujere.
Alende ne’e nia dehan, to’o agora infetadu COVID-19 abandona hela iha sira-nia hela fatin, no ba nesesidade bázika ai-han menus ba dadaun.
nia apela, ba komunidade Kovalima área iha afetadu COVID-19, atu kontinua kumpre regras estadu emerjénsia no kumpre protokolu MS no Organizasaun Saúde Mundiál ba prevensaun Covid-19. Kumpri regras Covid-19 mak hanesan, fase liman ho sabaun, uza maskara no mantein distansiamentu sosiál.Ana
