UDT Ejize Deputadu Sira Viajen Bá Bobonaru, Obrigasaun Tama Iha Kuarentena

Naunil media (Díli), Xefe Bankada Uniaun Demokrátika Timorense (UDT), Francisco David Xavier Carlos, husu ba Prezidente Parlamentu Nasionál (PPN) atu desidi deputadu/a sira ne’ebé hala’o viajen ba munisípiu Bobonaru ho Kovalima, fila mai  tenke obrigasaun tama kuarentena.

Xefe Bankada UDT, Francisco David Xavier Carlos ba jornalista sira, liuhusi intervensaun polítika, iha debate renovasaun EE-11, iha Parlamentu Nasionál, segunda (01/03).

“Ami husu ba deputadu sira ne’ebé husi komisaun B asuntu negósiu estranjeiru, defeza no seguransa hetan autorizasun hodi hala’o viajen ba Maliana fila mai sira tenke obrigatoriu tama kuarentena”, dehan Francisco.   

Francisco hatutan,  mesmu iha deklarasaun estadu emerjénsia la bandu deputadu sira, atu hala’o sira-nia funsaun. Maibé, tenke kumpre desizaun estadu nian tenke tama kuarentena.

“Bainhira fila husi fatin sira ne’ebé konsidera hanesan izoladu nune’e bele husik hela,  nu’udar mós hatudu  ezemplu di’ak ida ba ita-nia povu tomak atu halo tuir regras prevensaun kovid-19”. tenik Francisco.

Iha fatin hanesan deputadu Partiu Demokratika (DP) Mariano Assanami Sabino haktuir,  rekoñese liga ba substánsia kona-ba servisu deputadu sira-nia ne’e PPN tenke anúnsia desizaun ruma ba deputadu sira husi komisaun B  tanba direitu deputadu ba ne’ebé de’it laiha ema ida mak bandu.

“Ha’u hanoin substánsia ne’e importante, prezidente PN mak tenke halo deklarasaun katak loloos ne’e oinsá, ita iha kartaun ne’ebé ke livre ba iha ne’ebé de’it. Mais tenke kumpre regras ministériu Saúde (MS), laiha ema ida mak dehan deputadu ne’e, labele tama ba iha ne’ebá tenke kumpri mak regras. Se  viajen fila mai tama kuarentena, prontu kumpri  kuarentena”. dehan Sabino.

Entretantu ba kestaun ba deputadu komisaun B nian viajen bá Bobonaru ne’e, Prezidente Parlamentu Nasionál (PPN),  Aniceto Longuinhos Guteres Lopes deklara, sei fó sai desizaun bainhira akumula ona hanoin sira hotu hafoin anúnsia ba públiku. Ana