Suku Maluru Seidauk Asesu Eletrisidade, Bernardo: Deskonfia Impede Husi Komunidade
Naunil Media (Baukau), Xefe suku Maluro Bernardo de Carvailho informa, totál Umakain husi suku Maluru hamutuk 440 sedidauk asesu ba ai eletrisidade, deskonfia hetan impede husi komunidade Maluru oan iha Postu adiministrativu Kelikai, munisípiu Baukau.
Xefe suku Maluro Bernardo de Carvailho ba Naunil Media, iha sentru unidade neen (6), postu Kelekai, kuarta, (03/03).
“Bazeia ba energia eletrisidade ne’e mai ho pakote ida ne’ebé ami hamutuk ho empreza idamak halo proposta ba hatama iha Primeru Ministru Kay Rala Xanana Gusmão iha momentu ne’ebá nia mak Primeru Ministru. Nune’e to’o tiha iha gabinete Primeru Ministru no ami hasoru halo audénsia mós, depois empreza ne’e mai fali servisu. Maibé, Ha’u la hatene tanba empreza sira mai ne’e tauk la dada Eletrisidade pakote ida hamutuk ho Sentru Unidade 6 nian”, dehan Bernando.
Xefe suku Bernardo hatutan, área suku Maluru empreza sira atu mai dada eletrisidade sira tauk hotu, tanba Komunidade mak hameasa empreza sira.
“Komunidade sira hatete ba empreza sira katak iha ha’u-nia área no hau-nia rai tenke ha’u mak dada eletrisidade ba área suku ida ne’e. Nune’e empreza sira mai dada tauk, se karik sira hasoru ha’u nudar xefe suku ha’u haruka sira dada hotu, maibé empreza sira mai ema iha sorin-sorin hateten barak empreza fiar sira la bele dada eletrisidade ba suku Maluru”, Bernado haktuir.
Xefe suku ne’e deklara, la’ós empreza mak impede malu maibé ne’e husi suku Maluru ninia oan mak impede, tanba sira mós iha empreza rasik tanba ne’e sira impede.
“Empreza sira to’o duni iha suku Maluru, empreza sira servisu la’ós la tuir regra, maibé ha’u deskonfia maun no aman sira husi suku ne’e sira loke hotu empreza entaun sira ne’e mak impede, ne’e mak to’o agora ami-nia eletrisidade seidauk lakan”. Nia hato’o.
Tuir nia, pedidu dada eletrisidade liuhusi administrativu postu Kelikai, iha post Kilikai ne’e suku rua mak seidauk asesu energia eletrisidade suku Namanei no Maluro.
“Momentu ami enkontru ho Ajénsia Dezevolvimentu Nasionál (ADN) ne’e, ami hato’o ona pedidu ba Presidente Autoridade Munisípiu Baukau. Ne’e mós ami hato’o ba Presidente Autoridade katak iha post Kilikai suku rua mak seidauk asesu ba energia eletrisidade, nune’e konsege suku Namanei asesu ona eletrisidade, maibé falta suku Maluru mak seidauk asesu, agora tinan 2021 to’o 2022 ne’e tenki dada hotu eletrisidade”, Bernando sujere.
Nia dehan, durante ne’e komunidade suku Maluru asesu energia eletrisidade utiliza painesolár ne’ebé hetan apoiu husi empreza TILES no organizasaun naun govermental internasionál husi Austrália, oferese ba komunidade aldeia rua totál umakain 40, aldeia rua lahetan painesolár to’o agora.
Entretantu suku Maluru totál aldeia hamutuk haat (4) kompostu husi aldeia Loilubu Uagua, Namanei, Sama Fanu no aldeia Uaroro, Komunidade suku Maluro totál hamutuk umakain 440, feto na’in-198 no mane 187 total komunidade suku Maluru 385. Ipe/Pau
