PNDS Fura Bee-Moos Ba Komunidade Suku Uaitame
Naunil Media (Vikeke), Programa Nasionál Dezenvolvimentu Suku (PNDS) ba tinan 2021 fura bee-moos ba komunidade suku Uaitame tanba durante ne’e komunidade enfrenta ba bee-moos iha Postu Adiministrativu Uatolari, Munisípiu Vikeke.
Xefe EIT PNDS suku Uaitame Martino de Jesus ba Naunil Media, iha fatin fura bee-moos, iha área Maukiak, suku Matohoi, kinta (04/03).
“Fura bee-mos ba komunidade suku Uaitame ne’e, ami hetan konkordansia husi autoridade lokál suku Uaitame, veteranu/a intelektuál, komunidade no hamutuk ami membru PNDS mak deside katak bee-moos mak sai perioridade liu. Durante ne’e aldeia umaki’ik la asesu ba bee-moos. Tan ne’e PNDS tenke fura bee-moos ba sira, Tanba ne’e mak ami agora dadaun fura ona bee-moos ba komunidade suku Uaitame”, dehan Martino.
Martino hatutan, hahú fura bee dahuluk iha loron 18 janeiru 2021 fura 55 metru, maibé la hetan bee-moos ne’ebé agora muda fali fatin seluk tarjetu hakarak fura tan 85 metru to’o hetan bee.
“Pura bee-moos ne’e ami bolu empreza Peta Perkasa husi Indonézia montante hamutuk $ 12 mill ne’e to’o hetan, laiha durasaun tempu, empreza ne’e tenki hetan tiha bee”, Martino informa.
Nia dehan, husi inisiu pura bee iha fatin ida ne’e empreza ganrante katak bee iha, maibé ikus mai lahetan bee, hetan bee laduni forsa atu liga ba família rua ka tolu de’it. Ho nune’e deside muda maibé sei iha prosesu nian laran.
“Ami garante tenki bee sai. Sé fura iha fatin daruak ne’e mak bee laiha ita tenke salva osan muda fatin seluk tanba osan ne’e perioridade husi 2020 ne’e labele ba fali kofre estadu. Se fura iha ne’e la iha ita sei muda fali Uaidae”. tenik nia.
Ikus nia dehan, bee ne’e sei liga umakain 40 ba komunidade Uateme, aldeia Umaki’ik ne’ebé hela iha área suku Matahoi nian tanba durante ne’e sira la asesu ba bee-moos.Vit
