Feto La’ós Objetu Ba Mane, Maibé Kompleta Malu

Naunil Media (Díli), Diretóra FOKUPERS Fatima Pereira Guterres, informa feto la’ós sai objetu ba mane, maibé feto hanesan parseru ba mane atu kompleta malu iha família no sosiedade hodi nune’e bele partisipa iha prosesu dezenvolvimentu nasionál.

Tuir Diretora Fokupers Fatima,  iha selebrasaun loron feto nia FOKUPERS husu mane sira labele konsidera feto sai hanesan objetu maibé tenke sai hanesan parseru.

“Ha’u-nia lia menon iha ambitu selebrasaun loron feto nia buat ne’ebé, ha’u atu dehan mak  mane sira konsidera feto la’ós imi nia objetu, maibé papel atu kompleta malu iha uma laran tantu iha sosiedade tanba ne’e mak ha’u kaer fali feto sira vitima pasadu nia liafuan. Sé  mane ida mai husi feto ida tanba saida mak sira estraga fila fali feto halo violénsia ba feto no tanba saida mak la serbisu hamutuk no la’o hamutuk atu dezenvolve ita-nia nasaun”, dehan  diretóra Fokupers Fatima Pereira Guterres ba Naunil Media, Iha nia knaar fatin Farol, Sabadu (06/03).

Fatima hatutan,  kompete ho nasaun seluk tanba  liu tiha ona terus no la’ós tempu atu vinga malu ou baku malu. Nia  husu ba feto no mane atu serbisu hamutuk atu dezenvolve nasaun ne’e ba oin tanba tempu ne’ebé mak atu baku malu oho malu liu ona tanba. Oras  ne’e,  Timor-Leste tama ona independénsia presiza hamutuk atu bele dezenvolve nasaun ne’e la’o ba oin.

Diretóra FOKUPRS ne’e afirma,   sé kuandu Timor-Leste mak iha nafatin kazu violénsia domestika ou baku malu oho malu mak husi nasaun seluk nia matan bele hatete Timor krimonozu maibé loloos la’ós Krimonozu.

“Ita-nia kultura Timor-Leste ne’e lá’os baku malu oho malu, no kultura baku malu oho malu ne’e kultura kolonialismu nia kultura la’ós ita nia kultura”, Nia haktuir.

Ikus nia dehan presiza suporta malu hahú husi família no sosiedade atu bele partisipa iha prosesu dezenvolvimentu nasionál no baku malu mós la’ós Timor-Leste nian kultura. Jos