EU-OMS Kontribuisaun Fundu $ 150.000 Ba Voo PAM Díli-Kuala Lumpur
Naunil Media (Díli), iha kuarta (10/03), Embaixadór UE ba Timor-Leste, Andrew Jacobs, informa Uniaun Europeia (UE) liuhusi Organizasaun Mundiál Saúde (OMS) iha Timor-Leste (TL) disponibiliza ona dólar amerikanu rihun $ 150.000 ba Programa Ai-han Mundiál (PAM), atu bele kontinua hala’o voo umanitária ba pasajeiru no kargu sira entre Díli, no Kuala Lumpur Malázia.
Embaixadór UE ba Timor-Leste, Andrew Jacobs Naunil Media asesu liuhusi karta komunikadu imprensa ofisial husi Embaixada Uniaun Europeia iha Timor-Leste, kuarta ne’e.
Tuir Diplomata UE Andrew, TL taka nia fronteira iha pandemia COVID-19 ne’ebé hada’et iha mundu tomak, inklui impozisaun ba proibisaun ba fronteira aéreu iha Marsu 2020. Dezde tempu ne ‘ebá, voo komersiál hotu-hotu suspende hodi proteje nasaun hosi COVID-19.
Durante nee, PAM nia servisu aviasaun sai hanesan voo importante ida ba fornesimentu ekipamentu médiku esensial sira hodi hatan ba COVID19, no fornese transporte aéreu krítiku, inklui mós peritu sira ne’ebé serbisu atu apoia esforsu Governu Timor-Leste nian hodi satán virus ne’e.
“Ha’u haksolok tebes tanba OMS deside ona atu uza fundu balun husi ekipa Europeia hodi apoia servisu aviasaun PAM nian. Nune’e, sei garante katak, viajen umanitária ne’ebé liga Díli ba Kuala Lumpur, bele kontinua nafatin, hodi lori tulun médiku no transporte pasajeiru sira. Ligasaun aérea ne’e importante tebes iha momentu ida ne’e, tanba kazu COVID-19 iha Timor-Leste aumenta”, Embaixadór UE ne’e dehan.
Nia hatutan, dezde Juñu 2020, aviaun PAM nian hala’o ona operasaun hamutuk dala 19, tula pasajeiru hamutuk 1.354 no 14.5 toneladas ekipamentu médiku no abastesimentu esensiál sira ba TL. Organizasaun 83, inklui Governu TL no korpu diplomátiku nasaun nian, sai ona benefisiá ona hosi servisu aviasaun nee.
“Apoiu fundu hamutuk USD 150,000 ne’ebé estende ba PAM hodi mantein servisu aviasaun refere, foti hosi fundu USD 2.4 millaun ne’ebé fornese ba OMS iha Timor-Leste hosi UE atu apoia resposde ba COVID-19 no haforsa sistema saúde iha nasaun nee”, Nia akresenta.
Reprezentante Organizasaun Mundiál Saúde OMS, Arvind Mathur hatutan, servisu aviasaun PAM nian sai importante tebes iha nasaun ne’e, nia atuasaun jerál ba COVID-19 dezde inisiu.
“Hanesan mós ho sira seluk, OMS hetan ona benefísiu husi servisu aviasaun refere fó dalan ba ita atu lori sasán médiku no ema sira ne’ebé importante tebes ba atuasaun COVID-19 nian. Ami kontente katak, ho apoiu husi UE, ami bele hanaruk tan apoiu finanseiru hodi suporta PAM”. Tenik Arvind.
Nune’e mós Reprezentante WFP iha Timor-Leste Dageng Liu hatutan, “Fundu UE-OMS ne’e ajuda PAM atu asegura kontinuidade no posibilidade servisu aviasaun entre Dili-Kuala Lumpur too fulan Agostu 2021. “Obrigada ba kontribuisaun ne’e, PAM bele kontinua halo servisu aéreu ida ne’e hodi apoia povu Timor-Leste”. Tenik Dageng. Ipe