Covid-19, Rui: Kovalima Hahú Normál Maibé Kumpri Regra Prevensaun
Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa Munisípiu Kovalima atividade hahú la’o normál, maibé nafatin kumpri regra prevensaun no evita movimentu.
Kordenadór Forsa-Tarefa ba Mitigasaun Surtu Covid-19, Rui Maria de Araújo ba jornalista sira liuhusi komunikadu imprensa, iha Sala Situasaun Sentru-Integradu Jestaun Krize (SS-CIGC-sigla Portugués), iha Centro Covenções Dili (CCD), kinta (11/03).
“Serka Sanitária Munisípiu Kovalima hapara ona, Atividade iha Suai Vila, postu administrativu Sira inklui Fatumea hahú la’o normál, maibé eskola ho administasaun públika ne’e iha segunda oin mai hahú funsiona”, dehan Rui.
Eis Primeiru Ministru Rui hatutan, iha postu Administrativu Fatumea, deteta hikas pozitivu na’in 2 ho CT entre 39-42 signifika iha ona faze rekuperasaun husi kontaktu besik.
“Ohin, iha postu administrativu Fatumea, deteta hikas pozitivu nain rua, ho CT entre 39 ho 42 -signifika iha ona faze rekuperasaun husi kontaktu- besik nain-rua ne’ebé halo sira-nia segundu teste. Ho nune’e, kazu iha Fatumea sa’e ba 15. Ekipa konjunta saúde sei nafatin buka-tuir kontaktu-besik husi kazu pozitivu sira iha Fatumea”.Rui relata.
Rui Apala ba populasaun Kovalima maske governu deside ona atu hakotu serka sanitária, maibé nafatin kumpri disiplina ba medida protesaun no ijiene pessoál, no evita hakat ba-mai iha fronteira. Ivo
