Ema Na’in-21 Iha Kuarentena, Simu Hahan Tarde
Naunil Media (Díli), Kompaiña ne’ebé fornese hahan iha kuarentena Hotel Horizonte ba ema na’in-21 simu tarde la tuir oras han nian, nune’e sira bele hetan moras seluk.
Asuntu ne’e hato’o husi ema ida iha kuarentena Hotel Horizonte ne’ebé la fó sai nia identidade ba Naunil Media liuhusi via WhatsApp, domingu (14/03).
Ho aktu ne’e, nia, senti lasatisfas ho situasaun refere tanba sira-na’in-21 inklui labarik ki’ik oan tama tuku 20:00 kalan to’o tuku 8:15 dader sasan mak foin simu hahan husi jerenti fornesedór sira.
“Ami mai iha horiseik tuku 8 kalan to’o mai ohin tuku 8:15 mak foin fó hahan ba mai ami. Ami sei la moras ba Covid-19, maibé ami bele hetan moras fali ba moras seluk tanba han tarde liu”, dehan nia.
Nia hatutan,”Ami hamutuk na’in-21, feto 12, mane 9 no labarik ki’ikoan na’in-5, na’in rua tinan 5, nain rua tinan ida ho balun, na’in ida fulan 8”,
Nia haktuir, husi na’in-21 tama kuarentena tanba halo kontaktu besik ho pasiente Covid-19.
“Ami mai kuarentena tanba, ami-nia katuas iha uma ne’e mak pozitivu tanba nia halo kontaktu feziku ho médiku ida Pozitivu covid-19 iha Hospital Nasionál Guido Valadares (HNGV)”, tenik nia.
Entretantu ema na’in-21 tama iha kuarentena iha loron sábadu (13/03) iha Hotel Horizonte. To’o notísia ne’e tun Naunil media seidauk halo kontaktu ho parte fornesedór hahan ba ema kuarentena. Ivo