Ohin, Rejista tan Kazu Pozitivu Covid-19 Foun Na’in-18
Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa Ekipa Sala Situasaun Sentru-Integraddu Jestaun Kreize (SS-CIGC- sigla Portugés) rejista tan kazu pozitivu atuál Covid-19 foun hamutuk na’in 18, rekupera na’in-3 no ativu baixa 97.
Kordenadór Forsa-Tarefa ba Mitigasaun Surtu Covid-19, Rui Maria de Araújo ba jornalista sira liuhusi zoom kona-ba aktualiza kazu covid-19 iha Timor-Leste, domingu (14/03).
“Ami Hakarak hato’o ba públiku katak kazu foun ohin nian na’in-18. kazu 18 ne’e iha mane nain 4, feto nain 14, labarik idade 12 anus mai kra’ik iha nain 4, idade husi 16 to’o 44 iha ema nian 14, hotu-hotu asintomátiku, ka la hatudu sintomas. rekupera na’in-3 no kazu ativu baixa 97” dehan Dr. Rui.
Rui hatutan, Kazu detetadu 67 iha Díli ne’e, fahe ba cluster 18, namkari iha instituisaun 3, eventu 1, Suku 6 husi Postu Administrativu Dom Aleixo, no Postu Administrativu Vera Cruz.
“apela ba populasaun Timor-Leste tomak, liu-liu iha munisípiu Díli ho Baucau, atu nafatin hakmatek. Maski kazu konfirmadu aumenta ba beibeik, no naklekar mós ona ba Munisipiu Baucau, husu atu tu’ur nafatin hakmatek, atu nafatin matan-moris neon nain, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona”. tenik nia
Ikus nia husu, kumpri regras prevensaun Covid-19 maskara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk no mínimu metru ida ho balun. Ivo
