Covid-19: Governu Distribui Fos Ba Estudante 250 Hela iha Kost
Naunil Media (Díli), Iha kinta (18/03) ne’e, governu liuhusi Ministériu Solidaridade Sosial no Inkluzaun (MSSI) distribui fos ba estudante hamutuk 250 ne’ebé hela kost, ámbitu implementasaun serka Sanitária ba Prevensaun Covid-19 iha munisípiu Díli.
Ministériu Solidariedade Sosial no Inkluzaun (MSSI) Diretór munisípiu Dili, Luis da Costa ba Naunil Media, iha fatin distribuisaun fos ba estudante sira, Bebora, Kinta.
Luis hateten, programa apoia subsídiu alimentár ba estudante sira ne’ebé husi Munisípiu seluk mai hela iha kost distribui fos ba estudante sira to’o loron 4 ona hahú segunda to’o kinta.
“MSSI distribui fos ba estudantes sira ne’e orientasaun husi Diretór Jerál husi Ministériu Ensinu Superiór no Arte Kultura (MESAK) estudante hotu tenki aponta naran iha sira-nia universidade depois maka ministeriu ensinu Superiór enkamina ba MSSI”, Luis esplika.
Nia deahn, estudante sira ne’ebé maka hetan ona subsídiu alimentár fos kada kost ida simu fos saka ida, maska iha uma kost laran ema na’in rua ka tolu tenki hetan fos saka ida, la’os kada ema ida saka.
“Distribui fos ba estudante seidauk detekta lolos totál númeru ba estudante ne’ebé maka atu simu subsidiu alimentár ne’e, maibé provizoriu por volta 250 pesoas mak simu ona fos”. tenik nia.
Iha fatin estudante benifisiariu husi Universidade Nasional Timor Lorosa’e (UNTL), Germano Afonso haktuir, senti kontenti tanba ohin hetan ona subsídiu alimentár fos saka ida ne’ebé apoia husi MSSI hodi bele auguenta moris iha serka sanitária nian laran.
“Ami estudante sira ne’ebé maka hela iha kost senti kontente mesmu simu deit maka fos, maibé labuat ida tanba oin loron ami-nia fos mós atu remata ona”. tenik Germano. Cul