Evita Tranzmisaun lokál Covid-19, Taur: Depende Ba Komportamentu Sidadaun
Naunil Media (Díli), Primeiru-Ministru (PM) Taur Matan Ruak hateten, atu evita tranzmisaun lokál Covid-19 depende fila fali ba komportamentu sidadaun sira-nian kontribuisaun ba prevensaun surtu ne’e tan fó oportunidade ba ekipa liña frente sira hala’o sebisu.
Primeiru-Ministru Taur Matan Ruak Naunil Media asesu liuhusi pajina Primeiru Ministru, kinta (18/03).
“Ita Ko’alia to’o ne’ebé de’it kona-ba KOVID-19, maibé wainhira sidadaun sira-nia komportamentu la kontribui ba prevensaun surtu ne’e rasik, mak susar atu halakon tranzmisaun lokál iha komunidade nia leet. Tanba ne’e ha’u husu ba sidadaun sira atu mantein kalma hodi fó oportunidade ba ekipa liña frente sira halo serbisu mitiga no prevene KOVID-19”,dehan Eis Prezidente Republika (PR) Taur Matan Ruak.
Eis Jenerál ne’e subliña, xave ba prevensaun KOVID-19 mak komportamentu, no hein vasinasaun ne’ebé daudaun ne’e Governu esforsu hela atu iha vasinasaun ba tempu badak ne’e.
“Hotu-hotu tenke kalma, ne’e importante loos, kalma ne’e importante liu, tanba ita hare ba mai buat ne’e fasil liu, tanba saida, tanba fokus ba ita-nia komportamentu, moras ne’e tuir ita-nia komportamentu, ita bele ko’alia to’o iha ne’ebé de’it mós xave iha buat rua de’it, ida ita-nia komportamentu, ida mak vasina. Ita la halo milagre, vasina seidauk iha presija ema nia komportamentu, taka ibun uza máskara, fase liman, labele halibur malu, kuandu moras ona informa lalais ba saúde, liu ida ne’e la iha”, dehan Xefe Governu kuarta ne’e iha Palasiu Governu.
Xefe Governu ne’e informa, faktu hatudu tranzmisaun lokál ne’ebé daudaun ne’e iha, mai hosi pasajen ilegál ne’ebé deskontrolu, maske nune’e Governu husu nafatin sidadaun sira atu keta pániku tanba tranzmisaun lokál ne’e sei iha kontrolu governu nian.
Entretantu Dadus atuál Covid-19 husi loron 18 marsu rejista kazu foun 13, kazu rekuperadu 1 no totál kazu sei baixa hela hamutuk 119.*/vit
