PTR Deolindo, Deklara Kazu Eis-Ministru Kalbuady Iha Hela Prosesu
Naunil Media (Dili), Prezidente Tribunal Rekursu Deolindo do Santos hatete kazu Eis Ministru Francisco Kalbuady lai sei iha hela prosesu nia laran.
Deklarsaun ne’e hato’o husi Prezidente Tribunal Rekursu Deolindo do Santos ba jornalista hafoin remata enkontru ho Prezidente da Repúblika Francisco Guterres “Lu Olo” iha palásiu Prezidensial Nicolao Lobato Bairu Pité Dili, Kuarta ( 24/03/21).
“Kona-ba kazu, arguidu Eis Ministru Kalbuady ne’e, sei prosesu nia laran ate agora seidauk iha julgamentu. Julgamentu seidauk ínisiu, entaun ha’u sempre dehan ba ita boot sira, ha’u labele emiti fali ha’u nia opiniaun agora tanba lei lapermiti ba buat ne’ebé sei la’o hela ka pendente hela.Tanba iha posibilidade prosesu bele monu fali ba ha’u entaun ha’u labele deside ona”.dehan PTR
Prezidente Tribunal Rekursu ne’e haktuir nia hanesan juiz, labele fo opiniaun ba públiku, tanba lei la permité.
Relasiona ho kazu kalbuady Lay nian ne’e iha loron tersa 23 de marsu 2021, iha palasiu prezidensial, Prokurador Jeral Republika (PJR) José Ximenes deklara, antes ne’e haruka ona mandadu Kapturasaun Internasionál ba Kalbuady, maibé to agora seidauk iha solusaun.
“Kalbuady agora ba pasiar iha ne’ebé hau la hatene, orsida mosu iha Indonézia, orsida mosu iha ne’ebá, ami haruka mandadu kaptura internasionál, Tribunál Distritál Dili dehan laiha lei, Tribunál Rekursu mós dehan laiha lei,” deklarasaun antes PJR
Nune’e tuir notisia ne’e mak públika iha Jornal Indepedenti iha tinan 2019, haktuir katak Advogadu Francisco Kalbuadi Lay, antes ne’e ninia kliente deskonfia komete krime rua iha tinan 2014 no 2018 ho tipu kazu ne’ebé diferente, mak komete krime partisipasaun ekonomiku ho brankamentu kapitais. Maibe kazu hirak ne’e hotu hein prosesu husi Trbunal. *jos/pau
