Covid-19: Kazu Foun Na’in-22, Rekupera Na’in-12

Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa  ekipa Sala Situasaun Sentru-Integraddu Jestaun Kreize (SS-CIGC- sigla Portugés)   Covid-19 kazu pozitivu foun rejista na’in-22, rekupera na’in-12, kazu ativu baixa husi totál   to’o ohin 297.

Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo ba jornalista sira liuhusi zoom, kinta (25/03).

“Dadus jerál kazu foun ohin 22, Kazu rekuperadu: 12 (nian 4 husi Fatumea, 1 husi cluster Bebonuk, 3 husi cluster BTN 2 Terra Santa, Madohi, 4 husi cluster SEFOPE), totál kazu ativu 257. husi kazu foun nain 22 ohin, iha mane nain 17, feto nain 5, ema sintomátiku 3, ema asintomátiku 19, husi totál kazu ativu to’o ohin (297), nain 283 (95,2%) maka la iha sintomas, nain 12 maka iha sintomas lijeiru (hanesan ho flu/konsitpasaun baibain) no nain 2 maka iha sintomas moderadu”, dehan Dr. Rui.

Dr. Rui hatutan, husi horiseik mai ohin hamutuk hotu LNS halo 538 testes PCR, husi horiseik mai ohin, teste PCR ba ema atu hetan autorizasaun esepsionál sai husi serka sanitária Munisípiu Díli hamutuk 123.

“Husi 11  Marsu to’o ohin (semana rua nia laran) iha pedidu autorizasaun esepsionál atu sai husin no  tama mai serka sanitária iha Munisípiu Díli, hamutuk hotu 2,129. Sekretariadu CIGC responde ona ba hamutuk hotu 1,748 pedidus (82%). Husi total ida ne’e, 491 (28%) maka hetan autorizasaun. Sira seluk la hetan autorizasaun tamba ou la prienxe kritériu ne’ebé define iha resolusaun Governu, ou rezultadu teste PCR pozitivu”, Rui haktuir.

Nia dehan, evolui surtu covid-19 iha munisípiu Díli ohin iha kazu foun 21,  kazu detetadu ka pozitivu iha Díli husi  loron  7 to’o 25  Marsu 2021 hamutuk hotu 238. Ho baze ba informasaun ne’ebé ekipa konjunta saúde nian rekolle, foku/cluster  kazu pozitivu iha Díli, Kazu detetadu 238   fahe ba cluster 48, namkari iha instituisaun 4, eventu 1 no fatin kuarentena 2, suku 16, iha Postu Administrativu Dom Aleixo, Vera Cruz, Nain Feto no Cristo Rei.

Evolui surtu covid-19 iha munisípiu Baukau kazu foun 1. hamutuk hotu iha baucau iha 20 kazu detetadus, iha cluster 7. Evolui  surtu covid-19 iha munisípiu Viqueque, ohin LA IHA iha kazu foun. Hamutuk hotu Munisipiu Viqueque deteta ona kazu konfirmadu nain 10 nune’e kazu detetadu iha Munisipiu Viqueque fahe ba cluster 3.

Nia informa,  surtu covid-19 iha munisípiu Kovalima, atividade funsiona hanesan baibain, membru familia nain 9 husi kazu konfiirmadu iha cluster Campo Alor, oras ne’e dadaun iha hela kuarentena iha Suai Vila. Kazu konfirmadu nain rua ne’ebé detetadu pozitivu iha Aldeia Baleo, Suku Belulik Leten, Postu Administrativu Fatumea, iha dia 11 de Marsu 2021, hahú ohin konsideradu rekuperadu, tamba rezultadu PCR negativu dala rua ona.

Evolui surtu covid-19 iha munisípiu sira seluk no RAEOA,Munispiu Lautém ho RAEOA sei nafatin ho kazu detetadu 1. Munisípiu sira seluk, seidauk iha kazu detetadu.

Rui apelu, ba komunidade iha munisípiu sira hotu, wainhira hatene kona-ba ema ruma ne’ebé sai husi Dili, halo favor informa autoridade sira atu bele halo atendimentu ba sira.

Ikus Rui husu, ba sarani katóliku sira hotu, katak orsida kalan tuku 8, Arsebispo Dioseze Díli sei diriji orasaun Ami Aman husi Semináriu Maior São Pedro São Paulo Fatumeta, hodi akompanã sarani iha mundu tomak ne’ebé sei simultaneamente, katak iha oras ne’ebé hanesan, sei hasa’e orasaun ne’e, tuir apelu husi Sua Santidade Papa Francisco. Keta haluha akompanã transmisaun   husi GMN TV. Vit/ipi