Covid-19: Pozitivu Foun 11, Rekupera 13 no Baixa Ativu 322

Naunil Media (Díli), Portavoz Kordenador Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo informa,  Kazu covid-19 komfirmadu rejistan tan foun hamutuk 11, iha munisípiu Díli no rekupara ema na’in-13 baixa hela hamutuk 322.

“Dadus jerál Kazu foun ohin 11, Kazu rekuperadu 13 no totál kazu ativu hamutuk 322. Husi kazu foun nain 11 ohin, iha mane nain 7, feto nain 4 hotu-hotu asintomátiku”, Portavoz Kordenador Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo ba jornalista sira lihusi zoom meeting, domingu (28/03).

Rui hatutan, husi horiseik mai ohin hamutuk hotu LNS halo 497 testes PCR, inklui ona iha laran 196 ne’ebé mai husi pedidu autorizasaun esepsionál atu sai husi serka sanitária iha Munisipiu Díli.

“Totál pedidu autorizasaun esepsionál atu sai husi no tama mai serka sanitária iha Munisipiu Díli, horiseik loron  27  Marsu, hamutuk hotu 110. Sekretariadu CIGC responde hotu kedas, maibé 33 pedidus la prienxe kriteriu  tuir  Resolusaun Governu”, nia realsa.

Nune’e nia dehan, ohin kompleta semana tolu, hahú deteta kazu pozitivu iha BTN II, Aldeia Terrasanta, Suku Madohi, no mós kazu iha Aldeia 20 de Setembru, Suku Bebonuk. To’o ohin, iha cluster 54 iha Munisípiu Díli, maibé ho baze da evolui propagasaun virus iha cluster sira ne’e.

Durante  semana rua ikus, sura husi loron  14 Marsu 2021, ekipa konjunta saúde deside atu deklara katak iha cluster 11 (20%), maka la ativu ona iha transmisaun virus, tamba iha semana 2 nia laran ona la iha kazu foun, no sira ne’ebé kontaktu-besik ho kazu pozitivu iha cluster hirak ne’e, sira-nia rezultadu teste PCR negativu dala rua.

“Ho nune’e, iha Munisípiu Díli, sei iha cluster 43 maka sei nafatin hatudu atividade hada’et- tutan virus SARS-CoV-2 husi ema ida ba ema seluk”, nia hateten.

Kordenador ne’e husu, CIGC-SS ho mós ema hotu ne’ebé servisu iha liña de frente, hakarak agradese ema hotu ne’ebé detetadu pozitivu, hafoin kolabora di’ak-tebes ho ekipa konjunta saúde, aseita ba izolamentu iha fatin ne’ebé Estadu determina, atu hase’es-an husi ema ne’ebé seiduak hetan da’et virus ne’e.

“ita hotu bele prevene, virus ne’e la da’et- belar liu-tan iha cluster sira ne’ebé durante semana rua ikus ne’e la ativu ona. Ba sira ne’ebé rekuperadu ona, parabéns ba imi nia sakrifisiu. Aproveita apela ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk”. tenik nia.

Ikus nia apela,   ba públiku katak sei nafatin iha ema ne’ebé, para além de la fiar, lakohi fiar, katak sira-nia rezultadu PCR pozitivu, insisti atu instituisaun Estadu nian halo tuir sira-nia hakarak, no la kohi kolabora ho autoridade sira atu ba iha fatin izolamentu ne’ebé Estadu determina.  

Respeita  ema nia direitu atu lakohi rekoñese katak nia iha problema, maibé sidadaun sira hotu mós iha dever atu proteje ema seluk nia saúde, no iha obrigasaun atu kolabora ho Estadu, wainhira mosu situasaun risku ba ema barak nia saúde prevene no mitiga surtu Covid-19. Vit