Luta Hasoru Covid-19 PR Lú OLo Husu Komunidade Tenki Kontribui

Naunil Media (Dili), Prezidente Repúblika (PR) Francisco Guterres Lú Olo, husu ba komunidade inklui entidades hotu-hotu atu tau forsa hamutuk luta kontra Covid-19 iha nasaun Timor-Leste (TL).

“Luta ida-ne’e oin-seluk. Ita labele hases ema ida, la iha ema ida bele hasees-an hosi luta ne’e. Tempu to’o ona atu ita hotu hotu, ita ida-idak, fó ita-nia kontribuisaun atu hamutuk hakaat liu susar ida-ne’e. Ita tenke hamutuk hodi hapara pandemia ida-ne’e, tau aas interese públiku no proteje nasaun nia murak boot liu hotu – ita-nia ema – tau aas liu interese rasik no polítiku ne’ebé de’it” hatete Prezidente Repúblika liu husi mensajen ba Aniversariu PNTL ba XXI iha Palásiu PR sabadu (27/032021),ne’ebé públika iha media ofisial PR.

Prezidente da Repúblika mós husu ema sira hotu iha responsabilidade aas iha sosiedade labele haluha no labele halo ema haluha risku ne’ebé mak ho Covid-19. Sira labele hasees-an no labele halo ema hases-an hosi medida sira ne’ebé Governu foti atu prevene no hamenus vírus Covid-19 hada’et husi ema ba ema.
“Iha situasaun krize ne’ebé grave, hanesan situasaun pandemia ne’ebé ita hasoru daudaun ne’e, ita tenke halo jestaun ida ne’ebé efikás no efisiente. Nune’e, ita presiza hatene saída mak ita atu halo, halo planeamentu, organizasaun, asaun no avaliasaun beibeik, no liuliu, ita tenke foti desizaun oioin ho lailais. Ba ida-ne’e, ita presiza rekursus hotu hotu, umanus, ekipamentu no orsamentu iha tempu badak nia laran atu nune’e organizasaun no instituisaun sira bele atua kedas”.hetete Prezidente da Repúblika.

Nia argumenta Sentru Integradu Jestaun Krize – nu’udar estrutura ida ne’ebé harii ho mekanizmu ida ne’ebé iha komandu, kontrolu no koordenasaun entre instituisaun sira – hatudu dadaun katak bele hatán di’ak ba krize ida-ne’e tanba la’o tuir kultura koopera malu no fahe malu sira-nia rekursus no sistemas informasaun no komunikasaun.*Jos