Covid-19: Pozitivu Foun na’in-21 Husi Díli
Naunil Media (Díli), iha segunda (29/03) ne’e, Portavoz Kordenador Forsa-Tarefa ba Prevensaun no Mitigasaun Surtu Covid-19 Dr Rui Maria de Araújo informa, kazu atual covid-19 komfirmadu rejistan foun hamutuk na’in-21 ne’e husi munisípiu Díli.
“Evolui surtu covid-19 iha munisípiu Díli ohin kazu foun 21. Nune’e, kazu detetadu ka pozitivu iha Munisipiu Dili husi loron 7 to’o 29 Marsu 2021, hamutuk hotu 350. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Díli sei iha cluster 45 maka sei nafatin hatudu atividade hada’et- tutan virus SARS-CoV-2 husi ema ida ba ema seluk, liu-liu iha Suku Bebobuk, Fatuhada ho Komoro”, Dadus ne’e Naunil Media asesu liuhusi nota ba imprensa husi Sentru Integradu Jestaun Krize (SIJK) ohin ne’e.
Tuir dadus jerál husi SIJK, kazu covid-19 foun ohin 21, kazu rekuperadu 1 no totál kazu ativu 342. Husi kazu foun nain 21 ohin, iha mane nain 13, feto nain 8. Sintomátiku nain 5 no Asintomátiku nain 16.
Husi horiseik mai ohin hamutuk hotu LNS halo 565 testes PCR, inklui ona iha laran 241 ne’ebé mai husi pedidu autorizasaun esepsionál atu sai husi serka sanitária iha Munisipiu Dili.
Dr.Rui dehan, total pedidu autorizasaun esepsionál atu sai husi no tama mai serka sanitaria iha Munisípiu Díli, horiseik loron 28 Marsu, hamutuk hotu 43. Sekretariadu CIGC responde hotu kedas, maibé 7 pedidu la prienxe kriteriu husi Resolusaun Governu.
Kordenador ne’e apela, ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk. populasaun Timor-Leste tomak, liu-liu iha Munisipiu Díli, Baukau ho Viqueque atu nafatin hakmatek pratíka nafatin medida prevensaun covid-19. vit
