Covid-19: Rejista Kazu Komfirmadu Foun 41 Husi Díli

Naunil Media (Díli), Portavoz  Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr. Rui Maria de Araújo informa, kazu Covid-19  resjita tan komfirmadu pozitivu foun hamutuk 41 husi munisípiu Díli.

Portavoz  Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr. Rui Maria de Araújo hato’o asuntu ne’e Naunil Media asesu  husi karta komunikadu imprensa husi fonte ofisial SIJK, tersa (31/03).

“Dadus jerál Kazu foun ohin 41,  Kazu rekuperadu: 8, Total kazu ativu 415, Husi totál kazu foun ohin: mane 24 no  feto 17.  Sintomátiku na’in  3 no Asintomátiku  38”, dehan Dr. Rui.

Dr Rui Hatutan, husi horiseik mai ohin hamutuk hotu LNS halo 1008 testes PCR, inklui ona iha laran 480, ne’ebé mai husi pedidu autorizasaun esepsionál atu sai husi serka sanitária iha Munisipiu Díli.

Totál pedidu autorizasaun esepsionál atu sai husi no tama mai serka sanitária iha Munisípiu Díli, horiseik loron  30 Marsu, hamutuk hotu 84. Sekretariadu CIGC responde hotu kedas, maibé 21 pedidus la prienxe kritériu  tuir  resolusaun governu.

Dr Rui explika, evolui surtu COVID-19 iha munisípiu Díli  kazu foun 41,  kazu detetadu  pozitivu  husi loron  7   to’o   31   Marsu 2021, hamutuk hotu 456. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili.

Ho nune’e, iha Munisipiu Dili, sei iha cluster 46 maka sei nafatin hatudu atividade hada’et- tutan virus SARS-CoV-2 husi ema ida ba ema seluk, liu-liu iha Suku Bebobuk, Fatuhada ho Komoro.

Informasaun adisionál Dr. Rui informa, ba públiku katak hahú ohin madrugada fatin izolamentu Vera Cruz simu tan kazu detetadu ida, sintomátiku, grave. Kazu ne’e, feto  idade 69, iha istória diabete ho obesidade. Hahú isin-manas no i’is-bo’ot semana 1 ona.

Dadaun ne’e pasiente halo hela tratamentu ba infesaun seluk ne’ebé mós afeta ninia pulmaun, no pasiente uza hela ‘’high flow oxigen’’. Iha mós kazu detetadu nain 3, sintomátiku moderadu, ne’ebé mós oras ne’e iha fatin izolamentu Vera Cruz. Sira nain 3 nia kondisaun estável.

Dr. Rui apela, ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika  ona katak sira la iha ona risku atu hada’et-tutan virus ba ema seluk no populasuan husi  Munisípiu Díli, Baukau ho Vikeke nafatin hakmatek, lalika sé tilun ba lia-anin ka rumores, pratíka nafatin medida prevensaun covid-19.Vit