UE-CEPAD: “Kumpriende Jornalista sira Iha Ámbitu Covid-19”

Nuanil Media (Díli), Uniaun Europeia no Centru  Estudu ba Paz no Desenvolvimento (CEPAD) ‘kumprende’ dezafiu ne’ebé ohin loron jornalista sira enfrenta iha  ámbitu serka sanitária ba prevensaun covid-19 tanba ne’e UE no CEPAD inisiativa fó apoia pulsa ba jornalista sira.

Tuir Diretór Ezekutivu CEPAD João Boavida   União Europeia no CEPAD fó apoiuinternet hodi hadi ‘a konetividade jornalista liña frente sira nian iha Timor-Leste.

“Asesu ba internet importante tebes ba jornalista sira hodi halo sira nia servisu ho livre no akuradu, no ajuda sira atu identifika informasaun ne ‘ebé la loos no notisia falsu, no  asegura sidadaun sira hodi asesu ba informasaun vitál no konfiável hodi proteje sira-nia an rasik husi virus COVID-19”, dehan  João Boavida liuhusi karta komunikadu imprensa ne’ebé naunil media asesu, iha tersa (31/03).

João hateten, iha kontestu COVID-19 no serka sanitári iha Timor-Leste, meiu komunikasaun sosiál sira iha papél fundamentál atu garante diseminasaun informasaun ne’ebé loos ba públiku. Asesu ba informasaun ho kualidade diak, importante tebes durante krize saúde global no jornalista sira sei sai guarda importante hodi kontra informasaun falsu durante pandemia ne ‘e.

“Iha tempu ne’ebé presiza tebes jornalista sira, barak mak lakon sira nia rendimentu tanba saláriu ko ‘a no pagamentu ne’ebé atraza, tanba situasaun ekonómika ne ‘ebé hamenus no restrisaun sira ne’ ebé Estadu Emerjénsia impoin”, João infroma.

Tanba ne’e nia dehan,  Uniaun Europeia no CEPAD  halo akordu ho Asosiasaun Jornalista AJTL no TLPU fó kartaun pulsa telefóniku ba jornalista hamutuk 450, ho folin USD 20 kada ema, hodi tulun selu internet no komunikasaun.

“Doasaun ba kartaun internet ne’e, finansia husi uniaun europeia liu husi inisiativa “reforsa akontabilidade governu nian ba covid-19,  liu husi promove liberdade no asesu ba informasaun iha Timor-Leste”ne’ebé implementa husi CEPAD”,  Nia realsa.

Nia explika, inisiativa ne’e foka liliu ba grupu sira ne ‘ebé esperiénsia difikuldade atu hetan asesu ba informasaun. Projetu ne e fó kbiit ba sidadaun sira atu hetan asesu ba informasaun liuhosi atividade edukasaun, hasa ‘e koñesimentu kona-ba sira-nia direitu no promove partisipasaun iha debate demokrátiku iha Timor-Leste.

“CEPAD fiar katak informasaun ba públika ne ‘ebé konfiavel no loos ne’ e importante tebes, liuliu durante tempu krize COVID-19 nian ne ‘e, no CEPAD sente privilejiadu atu apoia mídia hodi garante katak informasaun sira ne’ e asesivel ba públiku”. tenik João.

Embaixadór Uniaun Europeia ba Timor-Leste Andrew Jacobs haktuir,  “difikuldade ba sirkunstánsia ekonómika ne’ebé kauza husi COVID-19 signifika katak jornalista sira nia fonte hodi buka-moris hetan ameasa iha tempu ne’ebé ita presiza tebes. Ohin hau sente orgullu tebes atu suporta inisiativa ida nee”.

Diplomata ne’e dehan, jornalista sira presiza iha meius atu halo relatóriu ida ne’ebé loloos no tuir tempu, atu nune’ e públiku bele hetan informasaun kona-ba Surtu Covid-19,  oinsa atu proteje sira nia an no hirak ne’ebé sira hadomi, no oinsá mak halo funu hasoru COVID-19.

“Sei la iha tempu ne’ ebé importante liu ba media ne’ebe livre, no media independente la’ós deit atumoris, maibé atu dezenvolve an mos. Jornalizmu Independente importante tebes atu fó asesu públiku ba informasaun ne ‘ebé loloos no kontra informasaun la loos kona-ba pandemia ne’ e”.

Ikus nia dehan, inisiativa ida-ne’e harii bazeia ba medida sira seluk ne’ebé hala’o ona hodi tulun meiu komunikasaun sosiál no jornalista sira, ne’ ebé  liu husi “Osan Povu Nian, Jere ho Diak’, no finansia husi Uniaun Europeia no Kooperasaun Portugeza. Medida apoiu sira ne’ e inklui sosa espasu publisidade iha jornál sira no fo insentivu atu insentiva publikasaun artigu sira iha área espesializada sira ba jornalista besik 115.

Entretantu iha tersa ne’e UE no CEPAD ofisial mente entrega pulsa ba  vice Presidente AJTL Aniseto dos Reis, Diretora Timor post Suzana Cardoso, Sekretario Jeral TLPU Orasio Babo no Representa STL Marcos da Silva.   Ipe